تحریک انصاف کے رہنما حسان نیازی کا انتخابات میں حصہ لینے کا فیصلہ

تحریک انصاف کے رہنما حسان نیازی نے عام انتخابات میں حصہ لینے کا فیصلہ کرلیا۔

حسان نیازی کی والدہ نے کاغذاتِ نامزدگی پر دستخط کی اجازت کے لیے لاہور ہائیکورٹ سے رجوع کرلیا ہے اور اس سے متعلق درخواست میں وفاقی و پنجاب حکومت اور کمانڈنگ افسر کو فریق بنایا گیا ہے۔

جنگ کے مطابق درخواست میں مؤقف اپنایا گیا ہے کہ الیکشن کمیشن نے انتخابی شیڈول کا اعلان کردیا ہے، حسان نیازی نااہل ہیں نہ ہی سزا یافتہ ہیں لیکن وہ اس وقت حراست میں ہیں۔

درخواست میں عدالت سے استدعا کی گئی ہے کہ حسان نیازی کو کاغذاتِ نامزدگی جمع کرانے کا عمل مکمل کرنے کی اجازت دی جائے۔

درخواست میں استدعا کی گئی ہے کہ عدالت اوتھ کمشنر کو حسان نیازی سے ملاقات کر کے کاغذاتِ نامزدگی کی تصدیق اور دستخط کی اجازت دے۔