امریکہ مغربی کنارے اور غزہ سے فلسطینیوں کی نقل مکانی کے خلاف ہے، انٹونی بلنکن

اسرائیل کے سب سے بڑے اتحادی اور سرپرست امریکہ کے وزیر خارجہ انٹونی بلنکن نے اردن کے شاہ عبداللہ کو یقین دہانی کرائی ہے کہ امریکہ فلسطینیوں کی نقل مکانی کے خلاف ہے۔ انٹونی بلنکن مشرق وسطیٰ کے دورے کے سلسلے میں اردن میں موجود تھے۔ تاکہ غزہ کے مستقبل کے بارے میں تبادلہ خیال کر سکیں۔

ملاقات کے دوران شاہ عبداللہ نے فلسطینیوں کی نقل مکانی کے حوالے سے اسرائیلی منصوبے پر اپنی تشویش کا اظہار کیا جس پر بلینکن نے زور دے کر کہا کہ  امریکہ مغربی کنارے اور غزہ سے فلسطینیوں کی نقل مکانی کے خلاف ہے، نیز امریکہ سمجھتا ہے کہ عام شہریوں کے تحفظ کی ضرورت تاکہ انہیں یہودی آبادکار مغربی کنارے میں تشدد کا نشانہ نہ بنا سکیں۔بلنکن کے حوالے سے یہ بات امریکی دفتر خارجہ کے ترجمان نے ایک بیان میں بتائی ہے۔

شاہ عبداللہ کا کہنا تھا کہ  واشنگٹن کا کردار اہم ہے اس لیے وہ اسرائیل پر دباؤ ڈالے کہ غزہ میں فوری جنگ بندی کی جائے ، وہاں انسانی تباہی بڑھتی جا رہی ہے۔

واضح رہے غزہ میں اب تک 22 ہزار 722 سے زائد لوگ جاں بحق ہو چکے ہیں۔ بیس لاکھ سے زیادہ فلسطینی غزہ میں بے گھر ہو چکے ہیں۔ لیکن امریکہ ابھی تک جنگ بندی کی بات نہیں کر رہا، نیز فلسطینیوں کی صرف نقل مکانی روکنے کے لیے اسرائیل پر دباؤ ڈالنے کے بجائے صرف مخالفت کی بات کی ہے۔

امریکی وزیر خارجہ کا یہ دورہ بیروت کے مضافات میں حماس کے نائب سربراہ کی اسرائیلی ڈرون حملے میں ہلاکت کے بعد شروع کیا گیا ہے۔ اگرچہ اس دورے کی تیاری پہلے سے تھی۔ لبنان کی سرحد پر اسرائیل اور حزب اللہ کے درمیان گولہ باری بھی ہوتی رہتی ہے۔ ادھر بحیرہ احمر میں بھی حوثیوں کے حملے جاری ہیں۔

بلینکن پیر کے روز قطر اور متحدہ عرب امارات میں اہم ملاقاتیں کریں گے۔ قطر میں بلنکن اسرائیلی یرغمالیوں کی رہائی کے لیے کوششوں پر بات چیت کریں گے۔ لیکن اب تک ایک سو سے زائد اسرائیلی یرغمالی حماس کی قید میں ہیں۔ بلنکن کی اب کوشش ہے کہ اسرائیل کے پڑوسی عرب ملک غزہ میں اسرائیل کی جانب سے کی گئے اندھی تباہی کے بعد غزہ کو پھر سے تعمیر کرنے اور حماس کے خاتمے کے بعد کی حکومت کے قیام کے لیے تعاون کریں۔

بلینکن کے وفد کی کوشش ہے کہ غزہ کے مستقبل کے حوالے سے عرب ممالک اسرائیلی خیالات کو قبول کر لیں۔' یہ بات ایک سینئیر امریکی ذمہ دار نے کہی ہے۔