سورج مکھی کی کاشت و پیداوار کے لحاظ سے روس پہلے، یوکرائن دوسرے پر آگیا

فیصل آباد: سورج مکھی کی کاشت و پیداوار کے لحاظ سے روس 9.69 ملین میٹرک ٹن کے ساتھ پہلے، یوکرائن 8.67 ملین میٹرک ٹن کے ساتھ دوسر ے اور پاکستان 0.4 ملین میٹرک ٹن کے ساتھ17 ویں نمبرپر آگیا ہے۔

لہٰذا تیل کی درآمد پر سالانہ خرچ ہونے والا اربوں روپے کا قیمتی ملکی زرمبادلہ بچانے کیلئے پاکستان کو زیادہ سے زیادہ سورج مکھی اور دیگر تیلدار اجناس کی کاشت کی جانب توجہ دیناہو گی جس کیلئے رواں موسم انتہائی موزوں ہے۔

جامعہ زرعیہ فیصل آباد کے ماہرین زراعت نے بتایاکہ گزشتہ سال پنجاب سے ایک لاکھ 27ہزار 755ایکڑ رقبہ سے92 ہزار 240 ٹن سے زائد پیداوار حاصل ہوئی تھی۔ انہوں نے بتایاکہ پنجاب میں سورج مکھی کی بہاریہ کاشت کے حوالے سے جنوبی علاقوں ملتان، بہاولپوراور ڈیرہ غازیخان ڈویژن میں موزوں ترین وقت 10فروری، ساہیوال، فیصل آباد اور سرگودھا ڈویژن میں 15فروری جبکہ لاہور، گوجرانوالہ اور راولپنڈی ڈویژن میں آخر فروری تک ہے۔

انہوں نے کاشتکاروں کو ہدایت کی کہ وہزیادہ سے زیادہ رقبہ پر سورج مکھی کی کاشت کریں جس سے انہیں 110 سے 120 دن میں فصل مل سکتی ہے۔

انہوں نے کہاکہ میرا اور بھاری میرا زمین سورج مکھی کی کاشت کیلئے موزوں ہے نیز مقامی طور پر تیار کردہ ہائبرڈ ایف ایچ 33اور بیرون ملک سے درآمد شدہ ہائبرڈ بیج ہر علاقہ میں دستیاب ہے۔انہوں نے کہاکہ کاشتکار پودوں کی مطلوبہ تعداد کے حصول کیلئے 2سے اڑھائی کلوگرام بیج فی ایکڑ ڈالیں اور بوائی کیلئے ایسا ڈبلر استعمال کریں جس میں کھیلیوں کا درمیانی فاصلہ 23سینٹی میٹر (9انچ)ہو۔اسی طرح ایک سوراخ میں کم از کم 2بیج ڈالے جائیں اور بیجوں کو ہاتھوں سے ہلکی سی مٹی کی تہہ ڈال کر ڈھانپ دیاجائے۔