وزیر دفاع خواجہ آصف نے کہا کہ بانی پی ٹی آئی عمران خان کا ملٹری ٹرائل ہو سکتا ہے۔ 

ایک انٹرویو میں وزیردفاع خواجہ آصف نے کہاکہ ملٹری کورٹ میں پہلے بھی ٹرائل ہوتے رہے ہیں، آئندہ بھی ہوتے رہیں گے، ملٹری قوانین کے تحت لوگوں کا ٹرائل کیا جاسکتا ہے،دن بدن یہ چیز واضح ہوتی جا رہی ہے کہ ان کا ٹرائل وہاں پر ہوگا۔

 خواجہ آصف نے کہا کہ  عمران خان کے خلاف شواہد ملٹری ٹرائل کی طرف جا رہے ہیں، تحقیقات صیغہ راز میں ہیں، مجھے ان تک رسائی نہیں، سوال یہ ہےکہ عمران خان نے فوجی اہداف پر مظاہرے کیوں کرائے۔

انہوں نے کہا کہ فیض حمید کی ان سے رفاقت رہی ہے، وہ بانی پی ٹی آئی کی داستانیں سنا رہے ہوں گے، ان کو اس بات کی خواہش ہو گی کہ سارا ملبہ کسی اور پر ڈال دیا جائے۔

وزیر دفاع نے کہا کہ جس شہرمیں مظاہرہ ہوا فوج کو ٹارگٹ کیا گیا، یہ بنیادی چیز ہمیں لیڈ کرتی ہے کہ اندر سے کچھ افراد ان کو ڈائرکٹ کر رہے تھے، ان مظاہروں سے متعلق لازمی طور پر عمران خان کی ہدایات تھیں۔

وزیر دفاع کا کہنا تھا کہ اقتدار کھونے کا جو افسوس بانی پی ٹی آئی کو تھا وہ جنرل (ر)فیض کو بھی تھا، فیض حمید آرمی چیف بننا چاہتے تھے، لسٹ میں ان کا نام تھا، اس سلسلے میں انہوں نے مسلم لیگ ن کی قیادت سے بھی رابطہ کیا، انہوں نے یقین دہانی کرائی کہ آپ آرمی چیف بنانے کی حمایت کریں گے تو میں وفاداری کے ساتھ نبھاؤں گا،انہوں نے اس سلسلے میں کچھ ضمانتیں بھی دیں۔

وزیر اطلاعات پنجاب عظمیٰ بخاری نے کہا کہ ہمیں جلسے سے نہیں پی ٹی آئی والوں کی کرتوتوں سے ڈر لگتا ہے۔ آج اسلام آباد میں ایک تماشہ ہونے جا رہا ہے لیکن جلسے جلوس سے بانی پی ٹی آئی جیل سے باہر نہیں آئیں گے۔

انہوں نے کہا کہ خیبر پختونخوا کے لوگوں  کو نئے پاکستان کے نام پر ٹیکہ لگا، آج خیبر پختونخوا کے لوگوں کو وہاں سے اٹھا کر یہاں لایا جائے گا، اللہ جانے آج کے جلسے میں شرکت کرنے کا کیا ریٹ ہو گا۔

لاہور میں پریس کانفرنس کرتے ہوئے صوبائی وزیر اطلاعات و نشریات عظمیٰ بخاری نے کہا کہ ہمیں جلسے سے نہیں پی ٹی آئی والوں کی کرتوتوں سے ڈر لگتا ہے۔ آج اسلام آباد میں ایک تماشہ ہونے جا رہا ہے۔

انہوں نے کہا کہ خیبر پختونخوا کے عوام کی بدقسمتی ہے کہ انہیں علی امین گنڈا پور جیسا وزیراعلیٰ ملا، اگر یہ تماشے اور ڈرامے کرنے ہیں تو کے پی میں ہی کر لو، تماشہ اسلام آباد میں لگانے کی کیا ضرورت ہے۔

عظمیٰ بخاری نے کہا کہ جلسہ جلوس سے بانی پی ٹی آئی جیل سے باہر نہیں آئیں گے، کے پی کے لوگوں کے مقدر میں شاید جلسہ جلوس لکھ دیا گیا ہے۔ انہوں نے کہا کہ ریاست سوئی ہوئی نہیں ہے جو بھی جلسہ کرنے آ رہے ہیں ان کو قانون کے مطابق آنا ہو گا۔ حالات خراب کرنے کے علاوہ آپ کو سب کچھ کرنے کی اجازت ہے۔

انہو ںنے مزید کہا کہ ڈیرہ غازی خان کے حالات بہت زیادہ بہتر نہیں ہیں، وزیراعلیٰ پنجاب مریم ن واز نے ڈی جی خان کے دورے کے دوران نیوٹریشن پروگرام کا آغا کیا ہے، اس کے علاوہ وزیراعلیٰ پنجاب مریم نواز شریف نے عوام کی سہولیا کے لئے اپنا گھر اپنی چھت پروگرام بھی پنجاب کے پسماندہ علاقوں کے شہریوں کیلئے شروع کیا ہے۔

پاکستان تحریک انصاف کا اسلام آباد میں پاور شور،جڑواں شہروں میں موبائل انٹرنیٹ سروس سست روی کا شکار ہے۔

پاکستان تحریک انصاف (پی ٹی آئی) آج اسلام آباد میں دن 2 بجے سنگجانی کے مقام پر جلسہ کرنے جا رہی ہے۔ جلسے کے پیش نظر اسلام آباد کے متعدد رستوں کو کنٹینرز لگا کر بند کر دیا گیا ہے جبکہ جلسے کے لیے پولیس کی اضافی نفری بھی طلب کی گئی ہے۔

اس کے علاوہ ایکسپریس وے کھنہ پل کے مقام پر کنٹینر لگا دیے گئے ہیں اور جبکہ مری روڈ کو فیض آباد کے مقام پر بند کر دیا گیا ہے۔دوسری جانب روات ٹی چوک سے راولپنڈی آنے والے راستوں کو کنٹینرز لگا کر بند کر دیا گیا ہے جبکہ فیض آباد انٹرچینج کو مکمل طور پر سیل کیا گیا ہے۔

جڑواں شہروں میں موبائل انٹرنیٹ سروس سست روی کا شکار ہے۔ صارفین کوسوشل میڈیا ایپس کے استعمال میں بھی دشواری پیش آ رہی ہے۔ انٹرنیٹ سروس کی سست روی کے باعث  شہریوں کو مشکلات کا سامنا ہے۔اسلام آباد اور راولپنڈی سمیت ملک کے دیگر علاقوں بالخصوص خیبر پختونخوا میں بھی انٹرنیٹ کے سست رفتار ہونے اطلاعات ہیں۔

ایک بیان میں ڈپٹی کمشنر اسلام آباد عرفان میمن نے کہا کہ اگر قانون کی خلاف ورزی ہوئی تو جلسے جلوس سے متعلق گزٹ نوٹیفکیشن کا اطلاق ہو جائے گا اور جلسے کا اجازت  نامہ منسوخ کر دیا جائے گا۔ پی ٹی آئی کے ارکان نے اگر طے شدہ نکات کی خلاف ورزی کی تو ان پر سزا کا اطلاق ہوگا، اگر جلسے کے اوقات کی پابندی نہ کی گئی تو جلسے جلوس سے متعلق قانون کا اطلاق ہوگا، جلسہ دیے گئے وقت کے مطابق ختم کرنا ہوگا۔

یاد رہے کہ پاکستان تحریک انصاف نے ضلعی انتظامیہ کی جانب سے این او سی منسوخ کیے جانے کے باوجود ہر صورت 22 اگست کو جلسہ کرنے کا اعلان کیا تھا تاہم یہ جلسہ ملتوی کر دیا گیا۔ پارٹی چیئرمین بیرسٹر گوہر نے اعلان کیا تھا کہ جلسہ اب آئندہ ماہ 8 ستمبر کو ہو گا۔مجسٹریٹ اسلام آباد کی جانب سے جاری نوٹیفکیشن میں کہا گیا تھا کہ ’22 اگست کا این او سی مذہبی جماعتوں کی احتجاج کی وجہ سے منسوخ کیا، آٹھ ستمبر کو انتظامیہ جلسے کو سکیورٹی فراہم کرے گی۔