اسرائیلی طیاروں کی پناہ گزین کیمپوں پر بمباری، 6 فلسطینی شہید

غزہ میں اسرائیل کی جارحیت جاری ہے۔ اسرائیلی طیاروں نے ایک بار پھر رات کو فلسطینی پناہ گزینوں کے کیمپوں پر بمباری کر دی۔ شجاعیہ، المواسی اور مغازی کیمپ پرحملوں میں 4 بچوں سمیت 6 فلسطینی شہید ہو گئے۔

غیر ملکی میڈیا رپورٹ کے مطابق گزشتہ روز اسرائیلی حملوں کے دوران شمالی غزہ میں مزید 18 فلسطینی شہید ہو گئے۔ صہیونی فوج نے شجاعیہ میں فضائی حملوں کے بعد زمینی حملے بھی شروع کر دیئے، جس کے باعث 60 ہزار فلسطینی انخلا پر مجبور ہو گئے۔

گزشتہ روز شمالی غزہ کے علاقے شجاعیہ میں اسرائیلی فوج کے حملوں کے بعد لوگوں نے نقل مکانی شروع کر دی تھی، اسی طرح المواسی کیمپ سے بھی 5 ہزار فلسطینی محفوظ علاقوں کی جانب انخلا کرچکے۔

دوسری جانب اسرائیلی کابینہ نے مغربی کنارے میں یہودی آبادکاری میں توسیع کی منظوری دے دی، اسرائیلی کابینہ نے فلسطینی اتھارٹی کے رہنماؤں اور عہدیداروں پر بھی پابندیاں عائد کرنے کی بھی منظوری دی۔