اسرائیل کی جانب سے ایک بار پھر غزہ پر فضائی حملے

تفصیلات کے مطابق نئی اسرائیلی حکومت کے اقتدار سنبھالتے ہی غزہ پر بمباری کی گئی ہے،  جس کے نتیجے میں  27فلسطینی زخمی ہوگئے ۔ غیر ملکی خبررساں ادارے کے مطابق  اسرائیل کی جانب سے دعویٰ کیا گیا ہے کہ حملہ فلسطین کی جانب سے غبارے چھوڑنے کے بعد کیا گیا۔ اسرائیل کی فوج نے غزہ اور جنوبی  شہر یونس میں حماس کے مرکز پر حملے کیے گئے  ،  تاہم ابھی تک کسی جانی نقصان کی اطلاع نہیں ہے۔ حماس کے ترجمان نے اسرائیلی حملوں کی تصدیق کرتے ہوئے کہا کہ فلسطینی ،مقبوضہ بیت المقدس اپنے حقوق اور مقدس مقامات کا دفاع کرتے رہیں گے ۔   غزہ سے نوجوانوں نے پتنگوں اور گیس کے غباروں کے ذریعے  آتش گیر مادہ اسرائیلی علاقوں کی طرف چھوڑا جس سے کھیتوں میں آگ لگ گئی ۔

دوسری جانب مقبوضہ بیت المقدس میں اسرائیلی قوم پرستوں نے اسرائیلی فورسز کی سیکورٹی میں ریلی نکالی۔ ریلی کے خلاف فلسطینیوں نے بھی احتجاج کیا۔جس پر اسرائیلی فوج نے دھاوا بول دیا،  تشدد کے نتیجے میں 27 فلسطینی زخمی ہوگئے۔ اسرائیلی ریلی اور فلسطینیوں کے احتجاج کے بعد بیت المقدس میدان جنگ بن گیا۔ اسرائیلی فورسز نے فلسطینیوں پر شیلنگ کی جس کی وجہ سے متعدد افراد زخمی ہو گئے جبکہ کئی فلسطینی نوجوانوں کو گرفتار کر لیا گیا۔

واضح رہے کہ گزشتہ ماہ حماس اور اسرائیلی فوج کے درمیان ہونے والی 11 روزہ لڑائی کے بعد جنگ بندی کا معاہدہ ہوا تھا۔ اسرائیل کے حملوں سے 11دن میں  232 فلسطینی شہید اور 1900 سے زائد زخمی ہوئے، شہداء میں 65 بچے اور 39 خواتین بھی شامل ہیں۔حملوں میں 1 لاکھ 20 ہزار سے زائد افراد کے گھر ملبے کا ڈھیر بن گئے۔ حماس کے حملوں میں 12 اسرائیلی بھی مارے گئے۔