تحریک انصاف نے پیپلز پارٹی اور نون لیگ کے پارٹی اکاؤنٹس تک رسائی مانگ لی

تفصیلات کے مطابق پیپلزپارٹی اور ن لیگ کی مبینہ فارن فنڈنگ کی تحقیقات کے معاملے میں  وزیرِ مملکت فرخ حبیب نے الیکشن کمیشن آف پاکستان میں درخواست دائر کر دی۔ فرخ حبیب نے درخواست میں استدعا کی ہے کہ پیپلز پارٹی اور نون لیگ کی بینک دستاویزات کا جائزہ لینے کی اجازت دی جائے۔

انہوں نے درخواست میں مؤقف اختیار کیا ہے کہ اکبر ایس بابر کو بھی پی ٹی آئی دستاویزات کا جائزہ لینے کی اجازت دی گئی تھی۔درخواست میں کہاگیا ہے  کہ اکبر ایس بابر کیس کی طرز پر ہم بھی ریکارڈ کا جائزہ لینا چاہتے ہیں،  الیکشن کمیشن فنانشل ماہرین کے ہمراہ ریکارڈ کا جائزہ لینے کی اجازت دے۔

گزشتہ برس  نومبر میں  الیکشن کمیشن نے غیر ملکی  فنڈنگ  کے الزامات پر پیپلز پارٹی اور مسلم لیگ (ن) کے خلاف تحقیقات کا آغاز کیا تھا۔ اس سے قبل پی ٹی آئی نے غیر ملکی فنڈنگ کے معاملے میں مسلم لیگ ن اور پاکستان پیپلز پارٹی کے خلاف سکروٹنی کے عمل میں تیزی لانے کے لئے الیکشن کمیشن آف پاکستان (ای سی پی) کو ایک نئی درخواست  جمع کروائی تھی ۔