قومی اسمبلی ہنگامہ آرائی میں زخمی ہونیوالی ملیکا بخاری کی اپوزیشن پر شدید تنقید

تفصیلات کے مطابق وزیر مملکت برائے موسمیاتی تبدیلی زرتاج گل کے ہمراہ میڈیا سے گفتگو کرتے ہوئے رکن قومی اسمبلی  ملیکا بخاری نے اپوزیشن پر تنقید کرتے ہوئے  کہا کہ کل پارلیمنٹ کی تاریخ کا  سیاہ ترین دن تھا ۔ کل جو ہوا وہ انتہائی شرمناک تھا اور  یہ ذاتی طور پر میرے لئے بہت ہی ذلت آمیز تھا۔انہوں نے کہاکہ  بدقسمتی سے یہ سلوک پاکستان مسلم لیگ (ن) کے لئے کوئی نئی بات نہیں ہے کیونکہ ماضی میں ان کے ساتھ خواتین کے ساتھ بد سلوکی کی تاریخ موجود ہے۔ ہم سب جانتے ہیں کہ انہوں نے سابق وزیر اعظم شہید بے نظیر بھٹو کے ساتھ کس طرح سلوک کیا ۔ ملیکا بخاری نے کہاکہ حکمران اور اپوزیشن جماعتوں کے تمام سینئر رہنماؤں سے درخواست کی ہے کہ وہ ساتھ بیٹھیں اوراب ایک  لکیر کھینچیں تاکہ خاتون پارلیمنٹرینز کو دوبارہ اس طرح کا سلوک برداشت  نہ کرنا پڑے ۔

ان کا کہنا تھا کہ ہم نے دنیا کو کیا تاثر دیا ہے کہ پاکستان میں خواتین پارلیمنٹیرینز بھی محفوظ نہیں ہیں؟ لیکن یاد رکھنا اگر آپ ہمیں طعنے  دیں گے ،  ہم پرکتابیں  پھینکیں گے   تو ہماری طرف سے بھی ردعمل سامنے آئے گا۔

اس موقع پر خطاب کرتے ہوئے صوبائی وزیر ماحولیات    زرتاج گل نے قومی اسمبلی کے اجلاس میں ہاتھا پائی کی شدید الفاظ میں مذمت کرتے ہوئے کہا کہ ملیکا بخاری  کو  کتاب  لگنے کے بعد آنکھ میں چوٹ لگی ہے۔ ان کاکہنا تھاکہ ن لیگ میں یہ رواج بن گیا ہے کہ جو خواتین کی جتنی تذلیل کرتا ہے اس کا اتنا بڑا عہدہ دے دیا جاتا ہے، طلال چودھری کو رات کو تنظیم سازی کرتے ہوئے ہاتھ تڑوانے پر ترجمان کا عہدہ دے دیا گیا۔ زرتاج گل نے مزید کہاکہ ن لیگ نے سیاسی لبادہ اوڑھ رکھا ہے یہ غنڈہ گردوں کی جماعت ہے۔ انہوں نے کہاکہ قبضہ مافیا کو پارلیمنٹ میں خواتین پر چھوڑ دیا گیا، ان کا لیڈر عوام کا پیسہ لوٹ کر باہر بیٹھا ہے، یہ قانون کا سامنا  کرنے کے بجائے خواتین پر حملہ آور ہوتے ہیں ۔

وزیر ماحولیات نے  اپوزیشن جماعت پر تنقید کرتے ہو ئےکہاکہ سارے معاشی اشاریے درست ہو گئے،  ملک آگے بڑھ رہا ہے ان سے یہ برداشت نہیں ہوا، ہم ان کا مقابلہ کریں گے ،ان کو تو ایک ایک سال کے لیے معطل کرنا چاہیے۔انہوں نے کہاکہ  ججوں پر حملے کروائے، پارلیمنٹ پر حملے کروائے، آپ کے چہرے عوام پرعیاں ہو چکے ہیں،  ان کو پارلیمنٹ میں آنے کا حق نہیں ہونا چاہیے ۔ ملیکہ بخاری نے بہادری سے ان کا مقابلہ کیا ہے ۔

خیال رہے کہ قومی اسمبلی اجلاس میں ہنگامہ آرائی کے دوران تحریک انصاف (پی ٹی آئی) کی رکن اسمبلی ملیکہ بخاری زخمی ہوگئی تھیں ، اس حوالے سے وزیرمملکت برائے اطلاعات و نشریات فرخ حبیب کا کہنا تھاکہ ملیکہ بخاری کی آنکھ پر بجٹ کی کتاب ماری گئی ہے جس سے ان کی آنکھ کا کورنیا متاثر ہوا ہے ۔