حکومت بجٹ حقائق کو عوام سے چھپانے کیلئے اپوزیشن ‏کی آواز دبارہی ہے: بلاول بھٹو

تفصیلات کے مطابق  ایک بیان میں پاکستان پیپلز پارٹی (پی پی پی) کے چیئرمین بلاول بھٹو زرداری نےحکومت پر تنقید کرتے ہوئے کہا  ہے کہ  عمران خان یہ نہ سمجھیں کہ گالم گلوچ اور بدتمیزی کرواکر وہ بچ جائیں گے، ہم بجٹ کا سارا کچاچٹھا عوام کے سامنے لاتے رہیں گے۔

انہوں نے مزید کہاکہ  عمران خان نے بجٹ میں مزدورکی آمدنی 20 ہزارروپے مقررکرکے 700 ارب روپے کے ٹیکس لگائے۔ عمران خان نے کہا کہ  عزیز ہم وطنو! ملک ترقی کر گیا ہے۔ صرف ایک سال میں عام آدمی کی آمدنی میں 17 فیصد کی کمی اورکھانے پینے کی اشیاء ‏کے خرچ میں 25 فیصد مہنگائی تبدیلی کا اصل چہرہ ہے۔

 بلاول بھٹو نے کہا کہ ہرتین میں سے ایک بچے کے غذائی قلت کے شکار ملک میں عمران خان نے دودھ اور ‏اس سے وابستہ مصنوعات پر 17 فیصد سیلز ٹیکس لگادیا ۔ چالیس فیصد غربت کے شکار ملک میں ڈیری مصنوعات پر 17 فیصد سیلز ٹیکس ہمارے ‏بچوں کے قتل کے مترادف ہے،  چائے کے ہرکپ کا مہنگا گھونٹ عمران خان کی تبدیلی کی وہ خوف ناک قیمت ہوگی جو ‏پاکستان کے عوام نے ادا کرنا ہے۔ ان کاکہنا تھاکہ  بجٹ کے نتیجے میں آٹا، تیل اوربجلی کی قیمتوں میں اضافہ مہنگائی ایک سونامی لائے ‏گا،  مہنگائی کےسونامی کے بعد عوامی ردعمل کو روکنا عمران خان کے بس میں نہ ہوگا۔