رؤف حسن کے بھارت کیساتھ رابطوں کے ہوشربا انکشافات

اسلام آباد: تحریک انصاف کے ترجمان رؤف حسن کے بھارت کے ساتھ روابط کی تفصیلات سامنے آئی ہیں جن سے بانی پی ٹی آئی عمران خان کے ریاست مخالف بیانیے کی بھارتی سہولت کاری بے نقاب ہوگئی ہے۔ ان روابط میں بھارتی صحافی کرن تھاپر کے ساتھ واٹس ایپ کے ذریعے کیے گئے رابطے شامل ہیں جو پاکستان کے حساس امور پر مبنی معلومات کے تبادلے پر مشتمل ہیں۔

رپورٹس کے مطابق رؤف حسن نے بھارتی صحافی کرن تھاپر سے 19 نومبر 2022 کو باضابطہ طور پر رابطہ کیا، جس میں شاہ محمود قریشی کے متوقع انٹرویو پر بات چیت کی گئی۔ اس کے بعد کرن تھاپر نے 24 نومبر 2022 کو جنرل عاصم منیر کے بارے میں اپنے اور رانا بنیرجی (سابق سیکرٹری را) کے ساتھ کیے گئے یوٹیوب انٹرویو کا لنک شیئر کیا۔

رؤف حسن نے بھارتی صحافی کے ساتھ حساس امور پر تبادلہ خیال کیا، جس میں 25 نومبر 2022 کو ایک پاکستانی صحافی کا جنرل عاصم منیر سے متعلق انٹرویو شیئر کیا۔ رؤف حسن نے پاکستانی صحافی کو ناقابل اعتبار قرار دیتے ہوئے بھارتی صحافی کے ساتھ حساس معلومات کا تبادلہ کیا۔

مزید برآں فروری 2023 میں رؤف حسن نے بھارتی موقف کو سراہتے ہوئے پاکستانی موقف پر اعتراض کیا اور یوکرین کے معاملے پر بھارت کی غیر جانبداری کو قابل فہم قرار دیا۔ رؤف حسن نے بھارتی صحافی کو بتایا کہ پاکستان نے اقوام متحدہ میں ووٹنگ میں حصہ نہیں لیا لیکن اطلاعات کے مطابق پاکستان یوکرین کو ہتھیار فراہم کر رہا ہے۔

مارچ 2023 میں رؤف حسن نے کرن تھاپر کو بھیجے گئے پیغامات میں بانی پی ٹی آئی کے گھر سے گرفتاریوں کو ریاستی تشدد قرار دیا اور کہا کہ پاکستان ایک خونی انقلاب کے لیے تیار ہے۔

دفاعی ماہرین کے مطابق 10 مئی 2023 کو زوم کے ذریعے کرن تھاپر کے ساتھ ریکارڈ کیے گئے انٹرویو اور 11 مئی 2023 کو واٹس ایپ کے ذریعے بھیجے گئے پیغامات میں رؤف حسن نے افواج پاکستان کی نقل و حرکت کو توڑ مروڑ کر پیش کیا، جس سے غیر ضروری ہیجان پیدا کیا گیا۔

 دفاعی ماہرین نے ان روابط کو پاکستان کے خلاف بھارتی میڈیا میں پروپیگنڈا کرنے کی سازش قرار دیا ہے اور رؤف حسن اور اس کے سہولت کاروں کے خلاف مکمل تحقیقات کا مطالبہ کیا ہے۔یہ واٹس ایپ پیغامات اس بات کی تصدیق کرتے ہیں کہ رؤف حسن نے بھارتی صحافی کرن تھاپر کو آمادہ کیا کہ وہ پاک افواج کے خلاف منفی تاثرات پر مبنی بیانیے کی تشہیر کرے۔