مکیش امبانی سے بھارت کے امیر ترین شخصیت کا اعزاز چھن گیا

نئی دہلی: بھارت کے معروف صنعت کار اور ریلائنس انڈسٹریز کے مالک مکیش امبانی سے امیر ترین ملک کی امیر ترین شخصیت کا اعزاز چھن گیا ہے۔

ایک حالیہ رپورٹ کے مطابق گزشتہ آٹھ مہینوں میں مکیش امبانی کی دولت میں 25 فیصد کی کمی دیکھی گئی ہے جس کے نتیجے میں ان کی مجموعی دولت 10.14 لاکھ کروڑ روپے رہ گئی ہے۔

دوسری جانب بھارت کے مقامی صنعت کار اور اڈانی گروپ کے سربراہ گوتم اڈانی کی دولت میں 95 فیصد کا اضافہ ہوا ہے اور اب ان کی مجموعی دولت 11.16 لاکھ کروڑ روپے تک پہنچ چکی ہے۔ اس حیران کن اضافے کے ساتھ گوتم اڈانی اب بھارت کے نئے امیر ترین شخص بن گئے ہیں۔

بھارت کے ایک معروف تحقیقی اور سرمایہ کاری گروپ ہوُروُن کی جانب سے جاری کی گئی تازہ ترین رپورٹ کے مطابق ایچ سی ایل ٹیکنالوجیز کے مالک شیو نادر فہرست میں تیسرے نمبر پر ہیں اور ان کی دولت میں ایک فیصد کا اضافہ ہوا ہے۔ جبکہ سیرم انسٹی ٹیوٹ آف انڈیا کے مالک سائرس ایس پونا والا چوتھے نمبر پر ہیں۔