ایف بی آر کو ماہانہ ٹیکس وصولی میں116 ارب روپے کا ریونیو شارٹ فال کا سامنا

اسلام آباد: فیڈرل بورڈ آف ریونیو (ایف بی آر) کو اگست 2024 کے لیے مقررہ ماہانہ ٹیکس وصولی کا ہدف حاصل کرنے میں 116 ارب روپے سے زائد کے ریونیو شارٹ فال کا سامنا ہے۔

ذرائع کے مطابق اگست کے لیے مقررہ ہدف 898 ارب روپے تھا، لیکن جمعہ کی شام تک صرف 782 ارب روپے کی وصولی ہو سکی۔ یہ بڑا شارٹ فال آئندہ مہینوں میں منی بجٹ کے ذریعے مزید ٹیکس لگانے کے اقدامات کی طرف دھکیل سکتا ہے، جس سے آئی ایم ایف پروگرام پر دباؤ بڑھنے کا خطرہ ہے۔

آئی ایم ایف کے ساتھ جاری پروگرام کے تحت حکومت کو مالیاتی استحکام کے لیے سخت اقدامات کرنے کی ضرورت ہے۔ اس میں اخراجات میں کمی، خاص طور پر ترقیاتی اخراجات اور ٹیکسوں میں اضافہ شامل ہے۔

ایف بی آر کے چیئرمین اور دیگر حکام سے اس حوالے سے رابطہ کیا گیا لیکن کوئی جواب موصول نہیں ہوا۔