بٹ کوائن کی قیمت 97,119 ڈالرکی بلند ترین سطح پر پہنچ گئی ہے،بِٹ کوائن کی قیمت میں اس سال دوگنا اضافہ ہو چکا ہے۔

میڈیا رپورٹس کے مطابق بِٹ کوائن کی قیمت میں اس سال دوگنا اضافہ ہو چکا ہے، یہ اضافہ ایسے وقت میں ہوا جب ایک رپورٹ میں دعویٰ کیا گیا کہ نومنتخب امریکی صدر ڈونلڈ ٹرمپ کی سوشل میڈیا کمپنی کرپٹو ٹریڈنگ فرم کو خریدنے کے لیے بات چیت کر رہی ہے۔

تاجروں پرامید ہیں کہ نومنتخب صدر ڈونلڈ ٹرمپ کی حکومت کرپٹو کرنسیوں کے لیے ایک دوستانہ ماحول فراہم کرے گی، کرپٹو مارکیٹ کی مجموعی قدر 3 ٹریلین ڈالر سے تجاوزکرگئی ہےجو ایک ریکارڈ سطح ہے۔

خیال رہے کہ کرپٹو کرنسی کی قیمت میں مسلسل اضافہ ہو رہا ہے گزشتہ روز بٹ کوائن کی قیمت 94 ہزار ڈالر کی سطح پر تھی جس  میں آج  مزید اضافہ ہو گیا ہے، پاکستانی روپوں میں ایک بٹ کوائن کی قیمت دو کروڑ 69 لاکھ روپے سے تجاوز کر گئی ہے۔

وزارت داخلہ پاکستان نے چیف سیکرٹری خیبر پختونخوا کو مراسلہ لکھ دیا ہے کہ یہ یقینی بنایا جائے کہ 24 نومبر کے احتجاج میں کوئی بھی سرکاری مشینری، لوگ یا پیسہ استعمال نہیں ہو گا۔

واضح رہے کہ بانی پی ٹی آئی کے حکم پر پاکستان تحریک انصاف نے 24نومبر کو اسلام آباد کی جانب احتجاجی مارچ کی کال دی ہے۔ اس حوالے پی ٹی آئی کی حکومت والے صوبے خیبر پختونخوا میں زور و شور سے تیاریاں جاری ہیں۔

اسلام آباد کی جانب احتجاجی مارچ کے حوالے سے پی ٹی آئی کے بانی کی اہلیہ بشریٰ بی بی 24 نومبر کے احتجاج کو کامیاب بنانے کے لیے متحرک ہوگئی ہیں اور پارٹی رہنماؤں کو اہم ہدایات جاری کی ہیں۔

احتجاج کو روکنے کیلئے پنجاب حکومت بھی متحرک ہوگئی۔ راستوں کی بندش کے لیے راولپنڈی میں کنٹینرز لگنا شروع ہوگئے ہیں اور پی ٹی آئی کارکنان کو روکنے کیلئے فوارہ چوک اور لیاقت روڈ پر کنٹینرز پہنچا دیے گئے ہیں۔ لیاقت روڈ پر چرچ کے قریب سڑک کی سائیڈ پر ایک اور فوارہ چوک پارکنگ پلازہ کے سائیڈ پر دو کنٹینرز رکھے گیے ہیں۔ 

حکومت کی جانب سے پی ٹی آئی کا احتجاج روکنے کیلئے بھرپور اقدامات کئے جارہے ہیں جبکہ مزید کنٹینرز کو شہر کی مرکزی شاہراؤں اور راستوں پر پہنچایا جارہا ہے۔ ابھی کنٹینرز کو شاہراؤں کے سائیڈز پر رکھا جائے گا۔

ترجمان دفتر خارجہ نے افغانستان سے دہشتگرد گروپوں کو  ملنے والی حمایت پر تشویش کا اظہار کیا ہے۔

ترجمان دفتر خارجہ ممتاز زہرا بلوچ نے  اسلام آباد میں ہفتہ وار پریس بریفنگ کے دوران کہا کہ  پاکستان  کو  افغان سرزمین پر دہشتگرد گروہوں کی سرگرمیوں پر تشویش ہے، دہشتگردی صرف افغانستان نہیں بلکہ پاکستان سمیت ہمسایوں کے لیے بھی خطرہ ہے۔
ممتاززہرا بلوچ کا کہنا تھا کہ ہم نے  افغانستان کو دہشتگرد گروہوں سے متعلق ٹھوس شواہد پیش کردیے ہیں، افغانستان کو دہشتگرد عناصر کے خلاف کارروائی کرنی چاہیے،  ہم امید کرتے ہیں کہ افغانستان بین الاقوامی سطح پر اپنے وعدے پورے کرے گا۔
افغانستان میں خصوصی مندوب کی تقرری  کے حوالے سے ان کا کہنا تھا  کہ افغانستان سے متعلق خصوصی مندوب کی تقرری کی کوئی تجویز فی الحال زیرِ غور نہیں۔ بیلاروس کے صدر 25 سے 27 نومبر تک پاکستان کا دورہ کریں گے۔
ہفتہ وار پریس  بریفنگ میں ترجمان دفتر خارجہ ممتاز زہرا بلوچ نے کہا کہ  اقوام متحدہ کی سلامتی کونسل میں غزہ جنگ بندی  کے حوالے سے پیش ہونے والی قرارداد کو امریکہ کی جانب سے ویٹو کرنا افسوسناک ہے۔
ممتاز زہرا بلوچ نے بتایا کہ بیلاروس کے صدر 25 سے 27 نومبر تک پاکستان کا دورہ کریں گے، دورے کے دوران بیلاروس کے صدر کی پاکستانی قیادت سے ملاقاتیں ہوں گی، دونوں ممالک کے درمیان تعاون کے فروغ سمیت اہم معاہدوں پر بات چیت ہوگی۔
ترجمان کے مطابق برطانوی وزیر ہمیش فالکنر نے بھی رواں ہفتے پاکستان کا دورہ کیا، برطانوی وزیر کی نائب وزیراعظم اسحاق ڈار اور وزیر داخلہ محسن نقوی سمیت اہم شخصیات سے ملاقاتیں ہوئیں۔