خیبرپختونخوا کے ضلع بنوں کے علاقے جانی خیل میں مارٹر گولہ پھٹنے سےدوبھائیوں سمیت 3 بچےجاں بحق ہوگئے۔ 

پولیس کے مطابق جانی خیل کے علاقے میں بچوں نے ویرانے میں پڑا مارٹرگولہ اٹھالیا جو دھماکے سے پھٹ گیا جس کے نتیجے میں 3 بچے جاں بحق ہوگئے۔ 

پولیس حکام کا بتانا ہے کہ جاں بحق ہونے والے بچوں میں 2 بھائی بھی شامل تھے، جب کہ تینوں بچے طالب علم تھے جو مدرسے سے گھر جارہے تھے۔

پولیس حکام کے مطابق لاشیں اسپتال منتقل کرکے علاقے میں حفاظتی اقدامات کے تحت سرچنگ شروع کردی گئی ہے۔ 

 خیبرپختونخوا کے قبائلی ضلع کرم میں 2 ہفتوں سے جاری رہنے والی  شدید کشیدگی کے بعد اب حالات معمول پر آنے لگے ہیں، گزشتہ شام فریقین کے درمیان فائر بندی کا معاہدہ ہونے سے حالات میں بہتری آ رہی ہے۔

ضلعی حکام  کا کہنا ہے کہ فائرنگ کے واقعے میں زخمی ہونے والا ایک اور زخمی دم توڑگیا جس کے بعد جاں بحق ہونے والے افراد کی تعداد 131 ہوگئی جب کہ 186زخمی ہیں

ضلع کرم میں جاری رہنےوالی  کشیدگی میں کمی کے بعد علاقے  میں 10 روز  بعد تعلیمی ادارے بھی کھل گئے تاہم پشاور  پاراچنار روڈ سمیت آمدورفت کے راستے تاحال بند ہیں جس کی وجہ سے اشیائے خورونوش، ادویات اور پیٹرول کی قلت برقرار ہے۔

دوسری جانب وزیراعلیٰ خیبر پختونخوا علی امین گنڈا پور  سے کرم کی صورتحال پر گرینڈ جرگے نے ملاقات کی جس دوران کرم کے مسئلے کے حل کے لیے مذاکرات اور دیگر معاملات پر تبادلہ خیال کیا گیا۔

اس موقع پر وزیراعلیٰ نے کہا کہ صوبائی حکومت جرگے کو مذاکرات کرنے کے لیے سپورٹ کرے گی، گرینڈ جرگے کے ذریعے کرم کے معاملے کا پر امن اور پائیدار حل نکلے گا۔

واضح رہے  کہ گزشتہ دنوں  ضلع کرم میں مسافر گاڑیوں پر حملے اور  اس کے بعد گزشتہ کئی روز سے جاری جھڑپوں سے اب تک 131 افراد جاں بحق ہوچکے ہیں۔

خیبر پختونخوا کے ضلع ڈیرہ اسماعیل خان میں پولیس موبائل پر فائرنگ سے اے ایس آئی شہید اور دو اہلکار زخمی ہو گئے

پولیس کے مطابق فائرنگ کا واقعہ تحصیل پہاڑپورمیں پل کے قریب  پیش آیا جہاں گھات لگائے حملہ آوروں نے پولیس موبائل پر اچانک فائرنگ کردی جس کے نتیجے میں ایک اے ایس آئی شہید اور 2 اہلکار زخمی ہوگئے۔

فائرنگ کے واقعے  میں جاں بحق اے ایس آئی کی لاش اور دونوں زخمیوں کو پہاڑ پور تحصیل ہیڈکوارٹر اسپتال منتقل کردیا گیا ہے۔

دوسری جانب گورنر کے پی فیصل کریم کنڈی اور وزیراعلیٰ علی امین گنڈاپور نے  واقعے کی مذمت کرتے ہوئے شہید افسر کے لواحقین سے اظہار تعزیت کیا، اور ضلعی انتظامیہ کو زخمیوں کو بہترین طبی امداد فراہم کرنے کی ہدایت کرتے ہوئے کہا کہ فائرنگ کے واقعے میں ملوث عناصر کی فوری گرفتاری کے لیے کارروائی کی جائے۔