حماس کی القسام بریگیڈز کے سربراہ محمد الضیف ابو خالد کی شہادت کی تصدیق

فلسطین کی مزاحمتی تنظیم حماس کی جانب سے اپنے عسکری ونگ القسام بریگیڈز کے سربراہ محمد الضیف ابو خالد کی شہادت کی تصدیق کردی گئی۔

رپورٹ کے مطابق القسام بریگیڈز کے ترجمان ابو عبیدہ نے ایک ویڈیو بیان میں محمد الضیف کی شہادت کا اعلان کرکیا۔

ترجمان ابو عبیدہ کا کہنا تھا کہ دشمن نے ہمارے دو عظیم رہنماؤں کو شہید کر دیا، لیکن ان کی میراث اور مزاحمت جاری رہے گی۔ حماس کے عسکری رہنماؤں کے قتل سے اسرائیل کے خلاف فلسطینی مزاحمت نہیں رکے گی۔

خیال رہے کہ اسرائیلی فوج نے گزشتہ برس جولائی میں محمد الضیف کو شہید کرنے کے منصوبے کا اعلان کیا تھا۔

اسرائیلی فوج کی جانب سے غزہ کے المواسی کیمپ میں ایک کمپاؤنڈ پر بڑا فضائی حملہ کیا گیا تھا جس کے باعث 90 فلسطینی شہید اور 300 سے زائد زخمی ہوگئے تھے۔

اسرائیلی فوج کی جانب سے دعویٰ کیا تھا کہ اس حملے محمد الضیف اور ان کے ساتھ موجود رافع سلامہ شہید ہوگئے تاہم حماس کی جانب سے اس دعوے کی تصدیق نہیں کی گئی تھی۔

یکم اگست 2024 کو اسرائیل کی فوج نے دعویٰ کیا تھا کہ اس نے جنوبی غزہ کے خان یونس میں ایک فضائی حملے میں ابو خالد کو ہلاک کر دیا۔

اسرائیل نے محمد الضیف ابو خالد پر 7 اکتوبر 2023 کو جنوبی اسرائیلی قصبوں پر حماس کے حملے کے ماسٹر مائنڈز میں سے ایک ہونے کا الزام بھی عائد کیا تھا۔