قیدیوں کے تبادلے کے بعدروس کا یوکرینی دارالحکومت کیف پر حملہ ، 12 افراد ہلاک

کیف: قیدیوں کے تبادلے کے بعد روس نے یوکرین کے دارالحکومت کیف پر مسلسل دوسرے روز فضائی حملے کیے جن میں 12 افراد ہلاک اور متعدد زخمی ہو گئے۔
غیر ملکی میٖڈیاکے مطابق اتوار کی صبح میزائل اور ڈرونز سے حملے کئے گئے ، روسی حملے میں رہائشی عمارتوں کو بھی شدید نقصان پہنچا۔
دوسری جانب یوکرین کی فضائیہ نے بتایا کہ ڈرونز، بیلسٹک اور کروز میزائلز پر مشتمل یہ حملے کئی شہروں کو نشانہ بنانے کے لیے کیے گئے، جب کہ بنیادی توجہ دارالحکومت کیف پر رہی۔
یوکرینی صدر ولادیمیر زیلنسکی نے حملوں کی مذمت کرتے ہوئے کہا کہ ہر رات ہماری افواج زندگیاں بچانے کی کوشش کرتی ہیں، روس کا یہ حملہ اس بات کا ثبوت ہے کہ جنگ کے جاری رہنے کی ذمہ داری صرف ماسکو پر ہے۔
خیا ل رہے کہ حالیہ حملے ایک ایسے وقت میں کیے گئے ہیں جب بین الاقوامی برادری روسی صدر ولادیمیر پیوٹن پر جنگ بندی کے لیے دباؤ ڈال رہی ہے۔ 
اس کے علاوہ قیدیوں کے تبادلے کے دوسرے مرحلے میں ہفتے کو 800سے زائد روسی اور یوکرینی فوجیوں کو رہا کیا گیا۔