وزیراعظم شہبازشریف ترکیہ، آذربائیجان، ایران اور تاجکستان کے 6 روزہ دورے پر روانہ

اسلام آباد:وزیراعظم شہباز شریف ترکیہ، آذربائیجان، ایران اور تاجکستان کے 6 روزہ دورے پر روانہ ہوگئے، نائب وزیراعظم و وزیر خارجہ محمد اسحاق ڈار، وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی بھی اُن کے ہمراہ ہیں۔
وزیر اعظم دوست ممالک کے رہنماؤں کے ساتھ دو طرفہ تعلقات، علاقائی اور بین الاقوامی اہمیت کے معاملات کے حوالے سے تبادلہ خیال کریں گے۔
وزیراعظم کا یہ دورہ 25 مئی سے 30 مئی 2025 تک جاری رہے گا، جس کے دوران وہ ترکیہ، ایران، آذربائیجان اور تاجکستان کا دورہ کریں گے۔ دورے کا مقصد ان ممالک کے ساتھ دوطرفہ تعلقات کو مزید مضبوط بنانا اور خطے میں تعاون کو فروغ دینا ہے۔
دورے کے دوران وزیراعظم متعلقہ ممالک کی اعلیٰ قیادت سے ملاقاتیں کریں گے، جن میں دو طرفہ تعلقات، علاقائی اور بین الاقوامی اہمیت کے امور زیرِ بحث آئیں گے۔
 وزیراعظم حالیہ بھارت-پاکستان کشیدگی کے دوران ان ممالک کی جانب سے پاکستان کے ساتھ اظہارِ یکجہتی اور حمایت پر ان کا شکریہ بھی ادا کریں گے۔
اس کے علاوہ وزیراعظم محمد شہباز شریف 29 اور 30 مئی کو تاجکستان کے دارالحکومت دوشنبے میں منعقد ہونے والی بین الاقوامی گلیشیئرز کانفرنس میں شرکت کریں گے۔
وزیراعظم شہباز شریف 30 مئی کو تاجکستان سے وطن واپس پہنچیں گے۔