پاکستان اسٹاک ایکسچینج میں زبردست تیزی، 100 انڈیکس 1,248 پوائنٹس کے اضافے سے 1.25 لاکھ کی سطح عبور کرگیا

پاکستان اسٹاک ایکسچینج (PSX) میں کاروباری ہفتے کے پہلے روز زبردست تیزی کا رجحان دیکھنے میں آیا، جہاں بینچ مارک KSE-100 انڈیکس 1,248 پوائنٹس کے نمایاں اضافے کے ساتھ 1,25,000 کی نفسیاتی حد عبور کر گیا۔

پی ایس ایکس کی ویب سائٹ کے مطابق، KSE-100 انڈیکس 1,248 پوائنٹس یا 1 فیصد اضافے کے ساتھ 125,627 پوائنٹس پر بند ہوا۔ گزشتہ کاروباری سیشن میں یہ انڈیکس 124,379 پوائنٹس پر بند ہوا تھا۔

یاد رہے کہ اس سے قبل 11 جون کو بجٹ پیش کیے جانے کے بعد بھی مارکیٹ میں بھرپور تیزی دیکھی گئی تھی، جب انڈیکس 2,328 پوائنٹس یا 1.91 فیصد اضافے کے ساتھ 124,352 پوائنٹس کی ریکارڈ سطح پر جا پہنچا تھا۔