کراچی میں سندھ ایمپلائز الائنس کا احتجاج، پولیس کا لاٹھی چارج اور واٹر کینن کا استعمال

کراچی پریس کلب کے باہر سندھ ایمپلائز الائنس (SEA) کے احتجاجی مظاہرے کے دوران مظاہرین کو ریڈ زون جانے سے روکنے کے لیے پولیس کی جانب سے لاٹھی چارج اور واٹر کینن کا استعمال کیا گیا، جس کے نتیجے میں شہر کے مختلف علاقوں میں شدید ٹریفک جام پیدا ہوگیا۔

احتجاج میں شریک سرکاری ملازمین نے تنخواہوں اور پنشن میں 70 فیصد اضافہ سمیت دیگر مطالبات کے حق میں بینرز اور پلے کارڈز اٹھا رکھے تھے۔ مظاہرین وزیراعلیٰ ہاؤس کی جانب مارچ کرنے کی کوشش کر رہے تھے کہ پولیس نے انہیں زبردستی روک دیا اور متعدد افراد کو گرفتار بھی کرلیا گیا۔

پولیس حکام کے مطابق، مظاہرین کو ریڈ زون میں داخلے کی اجازت نہیں دی جا سکتی تھی، جس پر اضافی نفری طلب کی گئی اور مظاہرین کو منتشر کرنے کے لیے واٹر کینن کا استعمال کیا گیا۔

ڈی آئی جی ساؤتھ سید اسد رضا نے ڈان ڈاٹ کام سے بات کرتے ہوئے بتایا کہ مظاہرین اور سرکاری حکام کے درمیان مذاکرات ناکام ہونے کے بعد پولیس کو کارروائی کرنا پڑی۔ انہوں نے بتایا کہ مظاہرین کے تین بڑے مطالبات ہیں:

گریڈ 1 تا 22 تک کے تمام ملازمین کی تنخواہوں اور پنشن میں 70 فیصد اضافہ

بلوچستان حکومت کے طرز پر 50 فیصد ڈسپیریٹی ریڈکشن الاؤنس (DRA) کی فراہمی

ریٹائرمنٹ کے بعد گروپ انشورنس اور بینیوولنٹ فنڈ کی ادائیگی

پولیس ایکشن کے بعد شہر کی مرکزی شاہراہوں پر بدترین ٹریفک جام دیکھنے میں آیا، جس سے شہریوں کو شدید مشکلات کا سامنا کرنا پڑا۔ مختلف علاقوں میں گاڑیاں گھنٹوں جام رہیں جبکہ پبلک ٹرانسپورٹ کی روانی بھی متاثر ہوئی۔