غیر اخلاقی اور گالیوں پر مبنی کونٹینٹ بنانے پر معروف یو ٹیوبر گرفتار

لکھنؤ: بھارت میں غیراخلاقی اور گالیوں والے معروف کونٹینٹ پر یوٹیوبر محمد عامر کو گرفتار کرلیا گیا۔

بھارتی میڈیا کے مطابق بھارت کی ریاست اتر پردیش کے شہر مراد آباد میں پولیس نےکارروائی کرتے ہوئے معروف یوٹیوبر محمد عامر کو گرفتار کیا۔

پولیس کے مطابق یوٹیوبر محمد عامر کو ایک شہری امان ٹھاکر کی جانب سے کی گئی شکایت پر گرفتار کیا گیا،شہری امان ٹھاکر نے پولیس کو شکایت کی تھی کہ یوٹیوبر عامر نے ہندوؤں کا مذہبی لباس پہن کر گالیوں والی ویڈیو بنائی ہے۔

پولیس کی جانب سے مزید بتایا گیا کہ اس کے علاوہ بھی یوٹیوبر پر اپنے چینل پر غیر اخلاقی اور گالیوں والا مواد بنانے، جاری کرنے اور تشہیر کا الزام ہے۔

خیال رہے عامر بھارت کے معروف یوٹیوبر ہیں جو مراد آباد کے رہائشی ہیں، ان کے انسٹاگرام پر 50 لاکھ فالوورز ہیں جبکہ یوٹیوب پر بھی 50 لاکھ سبسکرائبر ہیں۔