کل جماعتی حریت کانفرنس کی 5 اگست کو مکمل ہڑتال کی کال، بھارتی اقدامات مسترد

کل جماعتی حریت کانفرنس نے مقبوضہ کشمیر میں 5 اگست کو مکمل ہڑتال کی کال دے دی ہے، تاکہ بھارت کے 2019 کے یکطرفہ اور غیر قانونی اقدامات کے خلاف عالمی برادری کو واضح پیغام دیا جا سکے۔

کشمیر میڈیا سروس کے مطابق حریت کانفرنس کا کہنا ہے کہ کشمیری عوام 5 اگست کو یومِ سیاہ کے طور پر منائیں گے، کیونکہ یہی وہ دن ہے جب بھارت نے مقبوضہ کشمیر کی خصوصی آئینی حیثیت اور شناخت کو ختم کیا، جو کشمیریوں کے لیے انتہائی تکلیف دہ اور ناقابلِ قبول اقدام تھا۔

حریت کانفرنس اور دیگر آزادی پسند تنظیموں کی جانب سے سرینگر اور وادی کے دیگر علاقوں میں پوسٹرز بھی چسپاں کیے گئے ہیں، جن میں بھارتی حکومت کے 5 اگست 2019 کے فیصلوں کو مسترد کرتے ہوئے ان کے واپس لینے، سیاسی قیدیوں کی رہائی اور مسئلہ کشمیر کو اقوامِ متحدہ کی قراردادوں کے مطابق حل کرنے کا مطالبہ کیا گیا ہے۔

یاد رہے کہ بھارت نے 5 اگست 2019 کو یکطرفہ اقدام کرتے ہوئے آرٹیکل 370 اور 35A ختم کرکے مقبوضہ کشمیر کی خصوصی حیثیت ختم کر دی تھی، جس پر کشمیری عوام اور قیادت مسلسل احتجاج کر رہے ہیں۔