این ڈی ایم اے کا کراچی اور حیدرآباد میں شدید بارش کا الرٹ

نیشنل ڈیزاسٹر مینجمنٹ اتھارٹی (این ڈی ایم اے) نے کراچی اور حیدرآباد کے لیے اگلے چند گھنٹوں میں شدید بارش کا الرٹ جاری کر دیا ہے۔

اتھارٹی کے مطابق، کراچی میں آئندہ ایک سے ڈیڑھ گھنٹے کے دوران تیز بارش متوقع ہے، جب کہ حیدرآباد میں ایک سے دو گھنٹوں کے اندر شدید بارش ہونے کا امکان ہے۔

این ڈی ایم اے نے خبردار کیا ہے کہ ممکنہ بارش شہری علاقوں میں اربن فلڈنگ اور بجلی کی فراہمی میں خلل کا سبب بن سکتی ہے، جس سے عوام کو مشکلات کا سامنا ہو سکتا ہے۔

یاد رہے کہ کراچی میں سہ پہر کے بعد سے وقفے وقفے سے بارش کا سلسلہ جاری ہے، بعض علاقوں میں تیز، جب کہ کچھ مقامات پر ہلکی بارش ہو رہی ہے۔

شہر میں منگل کو ہونے والی موسلادھار بارش کے بعد متعدد سڑکیں زیرِ آب آ گئی تھیں، اور نکاسیٔ آب کا نظام مکمل بحال نہ ہونے کے باعث نئی بارش نے شہریوں کی مشکلات میں مزید اضافہ کر دیا ہے۔