نیتن یاہو کی غزہ پر مکمل فوجی کنٹرول برقرار رکھنے کی دھمکی

اسرائیلی وزیراعظم بنیامین نیتن یاہو نے ایک بار پھر غزہ پر مکمل فوجی کنٹرول کی دھمکی دیتے ہوئے واضح کیا ہے کہ اسرائیل، چاہے حماس جنگ بندی اور یرغمالیوں کی رہائی کے معاہدے کو تسلیم کرے یا نہ کرے، غزہ پر کنٹرول برقرار رکھے گا۔

آسٹریلوی میڈیا کو دیے گئے انٹرویو میں نیتن یاہو نے دعویٰ کیا کہ اسرائیل، غزہ میں جاری جنگ جیتنے کے قریب ہے، اور حماس کی مزاحمت کو ختم کرنا "ناگزیر" ہے۔ ان کا کہنا تھا کہ جنگ "آج ہی ختم ہوسکتی ہے، اگر حماس ہتھیار ڈال دے اور تمام یرغمالیوں کو رہا کر دے۔"

انہوں نے آسٹریلوی وزیراعظم انتھونی البانیز پر سخت تنقید کرتے ہوئے انہیں "کمزور سیاستدان" قرار دیا، اور مغربی ممالک پر الزام لگایا کہ وہ "دہشت گرد گروہوں کے حامی عناصر کو خوش کرنے" کی پالیسی اپنا رہے ہیں، جو ان کے بقول مغربی تہذیب کے لیے سنگین خطرہ ہے۔

نیتن یاہو نے حماس کا نام لیے بغیر کہا کہ "یہ وہ گروہ ہے جس نے خواتین کو قتل کیا، ان کی بے حرمتی کی، اور مردوں کے سر قلم کیے۔ اگر ایسے عناصر کسی آسٹریلوی وزیراعظم کو مبارکباد دیں، تو یہ افسوسناک ہی نہیں بلکہ خطرناک بھی ہے۔"

واضح رہے کہ گزشتہ ہفتے آسٹریلیا نے فلسطینی ریاست کو تسلیم کرنے کا اعلان کیا تھا، جس کے بعد اسرائیل اور آسٹریلیا کے تعلقات میں نمایاں کشیدگی پیدا ہو گئی۔ نیتن یاہو نے اس فیصلے کو "اسرائیل سے غداری" قرار دیا تھا۔