قومی کپتان محمد رضوان کیریبیئن پریمیئر لیگ (سی پی ایل) میں ایکشن کے لیے تیار

قومی ون ڈے ٹیم کے کپتان محمد رضوان پہلی بار کیریبیئن پریمیئر لیگ (سی پی ایل) میں ایکشن کے لیے تیار ہیں۔

محمد رضوان نے سی پی ایل فرنچائز سینٹ کٹس اینڈ نیوس پیٹریاٹس کے ساتھ معاہدہ کر لیا ہے، جس کے تحت وہ لیگ کے باقی ماندہ میچز میں ٹیم کی نمائندگی کریں گے۔

ذرائع کے مطابق، رضوان کو افغانستان کے فاسٹ باؤلر فضل الحق فاروقی کی جگہ اسکواڈ میں شامل کیا گیا ہے، جو قومی ٹیم کی مصروفیات کی وجہ سے ٹورنامنٹ ادھورا چھوڑ رہے ہیں۔

بتایا گیا ہے کہ آج بارباڈوس رائلز کے خلاف ہونے والے میچ میں رضوان کی شرکت تاحال غیر یقینی ہے، تاہم ان کی ٹیم میں شمولیت سی پی ایل میں ان کی پہلی انٹری کی نمائندگی کرتی ہے۔

سینٹ کٹس اینڈ نیوس پیٹریاٹس کی ٹیم میں رضوان کے ہمراہ پاکستان کے نسیم شاہ اور عباس آفریدی بھی شامل ہیں، جس سے ٹیم میں پاکستانی کھلاڑیوں کی موجودگی مزید مضبوط ہو گئی ہے۔

یاد رہے کہ یہ محمد رضوان کا دوسرا غیر ملکی ٹی ٹوئنٹی لیگ معاہدہ ہے۔ اس سے قبل وہ آسٹریلیا کی بگ بیش لیگ میں میلبرن رینیگیڈز کی نمائندگی کے لیے معاہدہ کر چکے ہیں۔