مٹی کا تیل 3 روپے 15 پیسے مہنگا، نئی قیمت 179.96 روپے فی لیٹر

ہائی اسپیڈ ڈیزل کے بعد مٹی کا تیل بھی مہنگا ہو گیا۔ آئل اینڈ گیس ریگولیٹری اتھارٹی (اوگرا) نے مٹی کے تیل کی قیمت میں 3 روپے 15 پیسے فی لیٹر اضافے کا نوٹیفکیشن جاری کر دیا ہے۔

اوگرا کے مطابق قیمت میں یہ اضافہ فوری طور پر نافذالعمل ہو چکا ہے، جس کے بعد مٹی کے تیل کی نئی قیمت 179 روپے 96 پیسے فی لیٹر مقرر کر دی گئی ہے۔ یاد رہے کہ اس سے قبل مٹی کے تیل کی قیمت 176 روپے 81 پیسے فی لیٹر تھی۔

دوسری جانب وزارت خزانہ نے بھی رات گئے ہائی اسپیڈ ڈیزل کی قیمت میں 2 روپے 78 پیسے فی لیٹر اضافے کا اعلان کیا، جس کا اطلاق آج سے ہو چکا ہے۔ تاہم، پیٹرول کی قیمت آئندہ 15 روز کے لیے برقرار رکھی گئی ہے۔