سکھر بیراج پر اونچے درجے کا سیلاب، کشمور و شکارپور کے کچے علاقے زیر آب

سکھر بیراج پر اونچے درجے کے سیلابی ریلے کے باعث کشمور اور شکارپور کے کچے کے علاقے شدید متاثر ہو گئے ہیں۔

دریائے سندھ میں گڈو سے آنے والا طاقتور سیلابی ریلا سکھر بیراج تک پہنچ چکا ہے، جس کے نتیجے میں بیراج پر شدید طغیانی اور اونچے درجے کا سیلاب دیکھا جا رہا ہے۔

سیلاب کے باعث کشمور اور شکارپور کے کچے علاقوں میں کھڑی کپاس سمیت دیگر فصلیں زیرِ آب آ گئیں، جب کہ خیرپور میں بچاؤ بندوں سے بھی پانی ٹکرا گیا ہے۔

سکھر میں دریائے سندھ کے وسط میں واقع مشہور سادھو بیلہ مندر کو زائرین کے لیے بند کر دیا گیا ہے، مندر کی سیڑھیاں اور کشتیوں کے لیے بنایا گیا پلیٹ فارم پانی میں ڈوب چکا ہے۔

ادھر لاڑکانہ کے موریالوپ بند پر پانی کے بہاؤ میں اضافے کے سبب کچے کے مزید دیہات زیرِ آب آ گئے ہیں، جس کے بعد متاثرہ دیہات کی مجموعی تعداد 30 ہو گئی ہے۔

دوسری جانب کئی متاثرہ علاقوں کے مکینوں نے محفوظ مقامات پر منتقل ہونے سے انکار کر دیا ہے، جب کہ لاڑکانہ سیہون بچاؤ بند کے اطراف کچے کے علاقوں میں ملیریا اور جلدی امراض پھیلنے لگے ہیں، جس سے صورت حال مزید بگڑنے کا خدشہ ہے۔