وفاقی دارالحکومت میں 24 گھنٹوں کے دوران ڈینگی کے 27 نئے کیسز رپورٹ،64 مریض زیر علاج

اسلام آباد: وفاقی دارالحکومت میں 24 گھنٹوں کے دوران ڈینگی کے 27 نئے کیسز رپورٹ  ہوئے ہیں، مختلف اسپتالوں میں اس وقت 64 مریض زیرِ علاج ہیں۔

تفصیلات کے مطابق گزشتہ چوبیس گھنٹوں کے دوران اسلام آباد کے دیہی علاقوں سے 20 اور شہری علاقوں سے 7 افراد میں ڈینگی وائرس کی تصدیق ہوئی۔

محکمہ صحت کے مطابق ایک روز کے دوران 34 ہزار 556 مقامات کی چیکنگ بھی مکمل کی گئی۔ مختلف سیکٹرز میں 1399 جگہوں پر اسپرے اور 914 مقامات پر فوگنگ کی گئی، سرویلینس کے دوران 213 مقامات سے ڈینگی لاروا بھی برآمد ہوا۔  

اس حوالے سے وفاقی دارالحکومت کی ضلعی انتظامیہ کا کہنا ہے کہ فیلڈ ٹیمیں ہاٹ اسپاٹس پر روزانہ مانیٹرنگ جاری رکھے ہوئے ہیں،جبکہ ڈینگی ایس او پیز کی خلاف ورزی پر مقامات سیل،سخت قانونی کارروائی ہوگی۔