احسن اقبال نے انسدادِ پولیو مہم کا افتتاح کردیا

اسلام آباد: وفاقی وزیر برائے منصوبہ بندی و ترقی احسن اقبال نے بچوں کو پولیو سے بچاؤ کے قطرے پلا کر آئندہ انسدادِ پولیو مہم کا افتتاح کردیا۔

ملک بھر کے 115 اضلاع میں ذیلی قومی انسدادِ پولیو مہم پیر سے اتوار تک جاری رہے گی۔

مہم کے دوران پانچ سال سے کم عمر 3 کروڑ 10 لاکھ سے زائد بچوں کو پولیو سے بچاؤ کے قطرے پلائے جائیں گے۔

منصوبہ بندی کے وزیر احسن اقبال نے پولیو وائرس کے مکمل خاتمے تک قومی کوششیں جاری رکھنے کے حکومتی عزم کا اعادہ کیا ہے۔

اسلام آباد میں پولیو کے خاتمے کیلئے قومی ٹاسک فورس سے متعلق وزیراعظم کی کمیٹی کے اجلاس کی صدارت کرتے ہوئے انہوں نے کہا کہ پولیو کا خاتمہ قومی ذمہ داری ہے جوپاکستان کے بچوں کی صحت، وقار اور مستقبل سے وابستہ ہے۔

انہوں نے علماء کرام، عمائدین اور رائے ساز شخصیات پر زور دیا کہ وہ غلط معلومات کا تدارک کرتے ہوئے ویکسینیشن پر عوام کے اعتماد کو مضبوط بنائیں۔

اجلاس میں بتایا گیا کہ پاکستان میں پولیو کے کیسز میں نمایاں کمی ریکارڈ کی گئی ہے جو دو ہزار پچیس میں اکتیس تھے اوردو ہزار چھبیس میں کم ہو کر چار رہ گئے ہیں جبکہ ماحولیاتی نگرانی کے نمونوں میں وائرس کی موجودگی کی شرح بھی دس فیصد سے کم ہوگئی ہے۔