محسن نقوی کا اسلام آباد میں ماڈل جیل اور نیشنل پولیس اکیڈمی میں زیرِ تعمیر ہاسٹل کا دورہ ،تعمیراتی کاموں کا جائزہ

اسلام آباد:وفاقی وزیر داخلہ محسن نقوی نے اسلام آباد میں ماڈل جیل اور نیشنل پولیس اکیڈمی میں زیرِ تعمیر ہاسٹل کا دورہ کیا اور تعمیراتی کاموں پر پیش رفت کا جائزہ لیا۔

تفصیلات کے مطابقوزیر داخلہ نے ماڈل جیل کی بیرکس کا معائنہ کیا اور تعمیراتی کام و معیار پر اطمینان کا اظہار کیا۔ حکام نے بریفنگ دیتے ہوئے بتایاکہ اسلام آباد جیل کا منصوبہ 2011 میں شروع ہوا تھا تاہم کئی برسوں تک تعطل کا شکار رہا۔

تاہم اب منصوبے کے فیز ون کا 85 فیصد سے زائد کام مکمل ہو چکا ہے اور آئندہ دو ماہ میں اسے فعال کرنے کا ہدف مقرر کیا گیا ہے،ماڈل جیل میں دو حفاظتی دیواریں تعمیر کی جا رہی ہیں جبکہ جدید ڈیجیٹل مانیٹرنگ سسٹم اور مرکزی کنٹرول روم بھی قائم کیا جائے گا۔

اس موقع پر وزیر داخلہ کا کہنا تھا کہ اسلام آباد میں جدید ماڈل جیل کا قیام سیکیورٹی کے پیش نظر نہایت ضروری ہے۔

وفاقی وزیر نے نیشنل پولیس اکیڈمی میں زیرِ تربیت اے ایس پیز کے لیے تعمیر ہونے والے ہاسٹل کے ماڈل روم کا بھی معائنہ کیا اور منصوبے کی بروقت تکمیل تعمیراتی کاموں کی رفتار اور معیار پر خصوصی توجہ دینے کی ہدایت کی۔

محسن نقوی نے کہا کہ ہاسٹل کی تکمیل سے پولیس افسران کو بہترین رہائشی سہولیات میسر آئیں گی جبکہ نیشنل پولیس اکیڈمی میں جدید انفراسٹرکچر کے قیام سے پولیس تربیت کے معیار میں مزید بہتری آئے گی۔

اس موقع پر آئی جی اسلام آباد پولیس علی ناصر رضوی، چیف کمشنر اسلام آباد محمد علی رندھاوا، ڈی جی ایف آئی اے ڈاکٹر عثمان انور اور دیگر متعلقہ افسران بھی موجود تھے۔