کراچی حیدرآباد موٹروے پرآئل ٹینکراور گاڑیوں میں تصادم، 13 افراد جاں بحق،متعدد زخمی

ویب ڈیسک:کراچی حیدرآباد موٹروے ایم 9 پر کاٹھور کے مقام پر پانچ گاڑیوں کے تصادم کے نتیجے میں بچوں سمیت 13 افراد جاں بحق جبکہ متعدد زخمی ہوگئے۔

تفصیلات کے مطابق ایم نائن سپر ہائی وے انصاری پل کے قریب چار تیز رفتار گاڑیاں اور مسافر بس مال بردار ٹرک سے ٹکرا گئیں،حادثے میں ایک مسافر بس، ایک مال بردار ٹرک جبکہ کم از کم تین کاریں ٹکرائیں جس کے نتیجے میں متعدد افراد زخمی جبکہ 10 موقع پر جاں بحق ہوئے۔
حادثے کے بعد ریسکیو 1122، چھیپا اور ایدھی کے رضاکار جائے وقوعہ پہنچے جہاں انہوں نے امدادی کام سرانجام دیے۔

ریسکیو حکام کے مطابق حادثے میں جاں بحق اور زخمی ہونے والوں کو اسپتال منتقل کردیا گیا ہے جبکہ مزید اموات کا خدشہ بھی ظاہر کیا جارہا ہے۔

حکام کا مزید کہنا ہے کہ حادثہ اس قدر شدید تھا کہ گاڑیاں اور کچھ افراد پل سے نیچے جاگرے، حادثے کے بعد لاشوں کو گاڑیاں کاٹ کر نکالا گیا، آئل ٹینکر کا ڈرائیور بھی موقع پر جاں بحق ہوگیا جب کہ بس ڈرائیور موقع سے فرار ہوگیا۔

 ڈی ایچ اے پولیس کے مطابق حادثہ چار گاڑیاں آپس میں ٹکرانے سے پیش آیا، جس کے باعث ہلاکتوں میں اضافے کا خدشہ ظاہر کیا جارہا ہے۔

دوسری جانب صوبائی وزیر داخلہ، گورنر سندھ، وزیراعلیٰ سندھ نے واقعے کا نوٹس لیتے ہوئے انسانی جانوں کے ضیاع پر افسوس کا اظہار کرتے ہوئے زخمیوں کو فوری طبی امداد فراہم کرنے کی ہدایت کردی۔

عینی شاہدین کے مطابق مال بردار ٹرک الٹنے کی وجہ سے ڈیزل سڑک پر پھیل گیا تھا جس کی وجہ سے حادثہ پیش آیا۔