ایرانی پاسداران انقلاب کی بحریہ کمانڈر علی رضا تنگسیری کی شہادت کی تصدیق

تہران :ایران نے پاسدارانِ انقلاب کی بحریہ کے کمانڈر علی رضا تنگسیری کی شہادت کی تصدیق کر دی، جو حالیہ امریکی اور اسرائیلی حملوں کے بعد دفاعی کارروائیوں کے دوران شدید زخمی ہوئے تھے۔

ایرانی خبر رساں ادارے تسنیم نیوز کے مطابق پاسدارانِ انقلاب کی جانب سے جاری بیان میں کہا گیا ہے کہ نیوی کمانڈر ریئر ایڈمرل علی رضا تنگسیری کی شہادت کی تصدیق کرتے ہوئے کہا ہے کہ وہ دشمن کے خلاف کارروائیوں کے بعد ایران کے ساحلی علاقوں اور جزیروں پر دفاعی پوزیشنز کو مضبوط بنانے کے دوران زخمی ہوئے تھے۔

جاری بیان میں مزید کہا گیا ہے کہ کہ علی رضا تنگسیری ایک تجربہ کار اور محنتی کمانڈر تھے جنہوں نے طویل عرصے تک خدمات انجام دیں اور حالیہ کشیدگی کے دوران اہم کردار ادا کیا۔

پاسدارانِ انقلاب کے مطابق حالیہ کارروائیوں میں دشمن کے اہم اہداف کو نشانہ بنایا گیا، جبکہ دفاعی نظام کو مزید مضبوط بنانے کی کوششیں جاری تھیں۔

خیال رہے کہ اس سے قبل اسرائیلی وزیرِ دفاع نے دعویٰ کیا تھا کہ 26 مارچ کو اعلیٰ افسران کو نشانہ بنایا گیا تھا۔

غیر ملکی میڈیا رپورٹس کے مطابق ایک اسرائیلی عہدیدار نے بتایا ہے کہ حملہ ایرانی شہر بندر عباس میں کیا گیا جہاں علی رضا تنگسیری کو نشانہ بنایا گیا تھا۔