مذاکرات میں اگر ہمارا سامنا اسرائیل فرسٹ کے نمائندوں سے ہوا تو کوئی معاہدہ نہیں ہوگا،ایرانی نائب صدر

تہران : اسلامی جمہوریہ ایران کے نائب صدر محمد رضا عارف نے کہا ہے کہ اگر مذاکرات میں ہمارا سامنا اسرائیل فرسٹ کے نمائندوں سے ہوا تو ہماری طرف سے کوئی معاہدہ نہیں ہو گا۔

ایرانی میڈیا رپورٹس کے مطابق نائب صدر محمد رضا عارف نے کہا ہے کہ وہ ایران امریکی مذاکرات میں ایرانی اسپیکر باقر غالب کی کامیابی کے لیے دعاگو ہیں، انہوں نے کہا کہ جس طرح ہم جنگ کے دوران فوج کے ساتھ کھڑے تھے، آج ہم مذاکراتی ٹیم کے پیچھے کھڑے ہیں۔

میڈیا رپورٹس کے مطابق انہوں نے کہا کہ مذاکراتی ٹیم کو مکمل اختیار کے ساتھ ذمہ داری کے ساتھ آگے بڑھنا چاہیے۔ جنگ میں شامل ایرانی جنگجوؤں کی طرح ہم مذاکرات میں شامل مذاکرات کاروں کےحامی ہیں۔

ایرانی میڈ یا کےمطابق نائب صدر کا مزید کہنا تھا کہ اگر ہم اسلام آباد میں امریکا فرسٹ کے نمائندوں کے ساتھ مذاکرات کریں تو دونوں فریقوں اور دنیا کے لیے فائدہ مند معاہدہ ممکن ہے۔ اگر ہمارا سامنا اسرائیل فرسٹ کے نمائندوں سے ہوا تو کوئی معاہدہ نہیں ہوگا۔ ہم لازماً پہلے سے بھی زیادہ بھرپور طریقے سے اپنا دفاع جاری رکھیں گے۔

خیال رہے کہ پاکستان کی میزبانی اور ثالثی میں امریکا و ایران کے مابین امن مذاکرات آج وفاقی دارالحکومت اسلام آباد میں ہو رہے ہیں جس میں شرکت کیلئے ایرانی و امریکی وفد پاکستان پہنچ چکا ہے۔

ایرانی وفد کی قیادت اسپیکر پارلیمنٹ محمد باقر قالیباف کر رہے ہیں جبکہ امریکی وفد کی قیادت نائب صدر جے ڈی وینس کر رہے ہیں۔