بات چیت میں متعدد نکات پر اتفاق رائے پر پہنچ گئے،ہم نےسفارتکاری کا راستہ بند نہیں،ایران

تہران : ایرانی وزات خارجہ نے کہا ہے کہ پاکستان کی میزبانی اور ثالثی میں ہونے والے ایران امریکا امن مذاکرات میں متعدد نکات پر اتفاق ہو چکا تھا تا ہم کسی حتمی معاہدے تک نہیں پہنچ سکے، ان کا کہناتھا کہ ہم نے سفارتکاری کا راستہ بند نہیں کیا۔

ایرانی میڈیا رپورٹس کے مطابق وزارت خارجہ کی جانب سے جاری بیان میں کہا گیا ہے کہ امریکا کے ساتھ آبنائے ہرمز، جوہری معاملہ، جنگی ہرجانہ اور پابندیوں کا خاتمے پر پر بحث ہوئی۔ ایران کے خلاف جنگ کا مکمل اختتام اور خطے کی صورتحال پر بھی بات چیت ہوئی۔

ترجمان اسماعیل بقائی نےمزید کہا کہ ہم بات چیت میں متعدد نکات پر اتفاق رائے پر پہنچ گئے، سفارتی عمل کی کامیابی کا انحصار دوسرے فریق کی سنجیدگی اور نیک نیتی پر ہے۔ سفارتکاری کا راستہ بند نہیں۔

ایرانی وزارت خارجہ نے کہا کہ ضروری ہے کہ دوسرا فریق زیادہ سے زیادہ اور غیر قانونی مطالبات سے گریز کرے اور  ایران کے حقوق کو تسلیم کرے ، ایران، پاکستان اور دوسرے دوستوں کے درمیان مشاورت جاری رہے گی۔

خیال رہے کہ اس سے قبل امریکی نائب صدر جے ڈی وینس نے اسلام آبادمیں پریس کانفرنس کرتے ہوئے کہا تھا کہ ایران نے ہماری شرائط قبول کرنے سے انکار کر دیا ، ڈیل کے بغیر واپس جا رہے ہیں،انہوں نے کہا کہ ہمیں واضح طورپر گارنٹی چاہیے کہ ایران جوہری ہتھیار نہیں بنائے گا۔