طلباء کیلئے اچھی خبر : پنجاب حکومت نے نئی آئی ٹی انٹرنشپ پروگرام کا آغاز کر دیا

لاہور: پنجاب میں حکومت نے انٹرن شپ پروگرام کے نئے مرحلے کا باقاعدہ آغاز کر دیا۔

تفصیلات کے مطابق پنجاب انفارمیشن ٹیکنالوجی بورڈ (پی آئی ٹی بی )کے تحت وزیراعلیٰ پنجاب آئی ٹی انٹرن شپ پروگرام کے دوسرے بیچ کے لیے رجسٹریشن کھول دی گئی ہے، اس اقدام کا مقصد آئی ٹی گریجویٹس کو معروف کمپنیوں کے ساتھ منسلک کر کے انہیں عملی میدان میں آگے بڑھنے کا موقع دینا ہے۔

اس انٹرنشپ پروگرام کے منتخب امیدواروں کو 5 ماہ تک نمایاں آئی ٹی کمپنیوں میں کام کرنے کا موقع دیا جائے گا، جہاں وہ جدید ٹیکنالوجی سیکھنے کے ساتھ اپنی پیشہ ورانہ مہارتوں کو بہتر بنا سکیں گے اور مضبوط پورٹ فولیو تیار کریں گے، اس دوران حکومت کی جانب سے انہیں 50 ہزار روپے ماہانہ وظیفہ بھی فراہم کیا جائے گا۔

امیدوار نے گزشتہ چار سال کے دوران آئی ٹی، کمپیوٹر سائنس یا متعلقہ شعبے میں ڈگری مکمل کی ہو،درخواست دہندہ کے پاس پنجاب کا ڈومیسائل اور درست شناختی کارڈ ہونا ضروری ہے،وظیفے کی ادائیگی کارکردگی اورایچ ای سی سے تصدیق شدہ ڈگری کی بنیاد پر ہوگی۔ 

اس حوالے سے پروگرام کے چیئرمین فیصل یوسف کے مطابق یہ اقدام نوجوانوں کو انڈسٹری کی ضروریات کے مطابق تیار کرنے میں اہم کردار ادا کرے گا، جس سے نہ صرف روزگار کے مواقع بڑھیں گے بلکہ صوبے کی ڈیجیٹل معیشت کو بھی تقویت ملے گی۔