میٹا کااپنے اکاؤنٹس سینٹر کو بہتر بنانے کیلئے تمام ایپس میں تبدیلی کرنے کا فیصلہ

ویب ڈیسک: مشہور ٹیکنالوکی کمپنی میٹا نے اپنے اکاؤنٹس سینٹر کو بہتر بنانے کا اعلان کرتے ہوئے اس میں مزید تبدیلیوں کا اعلان کیا ہے۔

تفصیلات کے مطابق اس اکاؤنٹس سینٹر کو اب میٹا اکاؤنٹ کا نام دیا گیا ہے جہاں کمپنی کی ایپس جیسے فیس بک، انسٹا گرام، تھریڈز اور واٹس ایپ سمیت تمام میٹا اکاؤنٹس تک بیک وقت رسائی ممکن ہوگی،ایپس کے ساتھ ساتھ کمپنی کی ڈیوائسز جیسے آرٹی فیشل انٹیلی جنس (اے آئی) گلاسز اور میٹا کوئیسٹ ہیڈ سیٹس تک رسائی بھی وہاں دی جائے گی۔

روپورٹس کے مطابق اس تبدیلی کا مقصد میٹا اکاؤنٹس کو کنٹرول کرنے کا عمل آسان بنانا ہے،میٹا کی جانب سے جاری بیان میں بتایا گیا کہ یہ اپ گریڈ بتدریج آئندہ سال تک متعارف کرائی جائے گی۔

میٹا ایپس کی تمام سیٹنگز تک میٹا اکاؤنٹ سے رسائی حاصل کی جاسکے گی اور آپ وہاں ای میل ایڈریسز، کنکٹڈ اکاؤنٹس اور تمام اکاؤنٹس کے لیے سنگل پاس ورڈ وغیرہ جیسے آپشنز استعمال کرسکیں گے،البتہ واٹس ایپ پاس کیز کو واٹس ایپ کے اندر ہی کنٹرول کیا جاسکے گا۔

اسی طرح کسی ایپ سے متعلق مخصوص سیٹنگز جیسے فیس بک پوسٹس دیکھنے والے افراد کی فہرست کو صرف فیس بک سیٹنگ میں ہی دیکھا جاسکے گا اور اس طرح کی مخصوص سیٹنگز میٹا اکاؤنٹ میں موجود نہیں ہوں گی۔

میٹا اکاؤنٹ میں پیرنٹل کنٹرولز میں صارفین کو دستیاب ہوں گے تاکہ آپ اپنے بچوں کے اکاؤنٹس کو سپروائز کرسکیں۔

کمپنی کے مطابق یہ صارف کا اختیار ہوگا کہ کونسی ایپس اور ڈیوائسز کو میٹا اکاؤنٹ ڈیش بورڈ کا حصہ بنائیں جبکہ آپ ہر اکاؤنٹ کے لیے مختلف میٹا اکاؤنٹس بھی تیار کرسکتے ہیں۔