اسحاق ڈار کا روسی وزیر خارجہ سے ٹیلیفونک رابطہ،دوطرفہ تعلقات ،عالمی امن و سلامتی پر تبادلہ خیال

اسلام آباد: نائب وزیر اعظم و وزیر خارجہ سینیٹرمحمد اسحاق ڈار اور روس کے وزیرخارجہ سرگئی لاروف کے درمیان ٹیلی فونک رابطہ ہوا۔

ترجمان دفترخارجہ کے مطابق گفتگو کے دوران دونوں رہنماؤں نے دوطرفہ تعلقات اور عالمی امن و سلامتی کے فروغ کے لیے کثیرالجہتی فورمز پر تعاون پر تبادلہ خیال کیا۔

ترجمان کے مطابق روسی وزیر خارجہ نے ایران اور امریکہ کے درمیان مذاکرات میں سہولت کاری کے لیے پاکستان کے تعمیری کردار کو سراہا۔

اس موقع پر اسحاق ڈار نے اس عزم کا اعادہ کیا کہ پاکستان تمام مسائل کے حل کے لیے بات چیت اور سفارت کاری کے فروغ کی کوششوں میں اپنا کردار جاری رکھے گا۔

ترجمان دفتر خارجہ نے مزید بتایا کہ دونوں رہنماؤں نے اعلیٰ سطحی روابط کو برقرار رکھنے کی اہمیت پر زور دیتے ہوئے وزیر اعظم شہباز شریف کے دورہ روس کو باہمی سہولت کے مطابق جلد از جلد دوبارہ طے کرنے پر بھی بات چیت کی۔

علاوہ ازاں اسحاق ڈار نے سرگئی لاروف کو پاکستان کے دورے کی دعوت بھی دی، جبکہ ٹیلیفونک رابطے میں دونوں ممالک نے رابطے میں رہنے پر اتفاق کیا۔