امریکا ایران حملوں میں شدت، خام تیل کی قیمتوں میں 3 فیصد سے زائد اضافہ

رائٹرز: مشرق وسطیٰ میں امریکا اور ایران کے درمیان بڑھتی ہوئی فوجی کشیدگی اور آبنائے ہرمز کے ذریعے توانائی کی ترسیل متاثر ہونے کے خدشات کے باعث پیر کو عالمی منڈی میں خام تیل کی قیمتوں میں 3 فیصد تک اضافہ ریکارڈ کیا گیا، جبکہ برینٹ خام تیل 90 ڈالر فی بیرل کی سطح عبور کر گیا۔

برینٹ خام تیل کے فیوچر 2.77 ڈالر یا 3.14 فیصد اضافے کے ساتھ 90.87 ڈالر فی بیرل تک پہنچ گئے، جو 11 جون کے بعد بلند ترین سطح ہے۔ گزشتہ ہفتے برینٹ کی قیمت میں مجموعی طور پر 15.9 فیصد اضافہ ہوا، جو اپریل کے بعد سب سے بڑا ہفتہ وار اضافہ ہے۔

دوسری جانب امریکی ویسٹ ٹیکساس انٹرمیڈیٹ (ڈبلیو ٹی آءی) خام تیل 2.35 ڈالر یا2.85 فیصد اضافے کے بعد 84.84 ڈالر فی بیرل پر ٹریڈ کرتا رہا، جو 12 جون کے بعد بلند ترین سطح ہے۔ ڈبلیو ٹی آئی کی قیمت میں گزشتہ ہفتے 15.5 فیصد اضافہ ریکارڈ کیا گیا، جو مارچ کے اوائل کے بعد سب سے بڑی ہفتہ وار بڑھوتری ہے۔

ہفتے کے اختتام پر مشرق وسطیٰ میں کشیدگی مزید بڑھ گئی، جہاں امریکا نے مسلسل نویں رات بھی ایران میں حملے کیے، جبکہ کویت اور بحرین نے بھی ایرانی حملوں کی اطلاعات دی ہیں۔

دونوں ممالک نے حالیہ دنوں میں بحری جہازوں کی نقل و حرکت کو بھی نشانہ بنایا ہے۔ امریکا کا کہنا ہے کہ وہ ایرانی بندرگاہوں پر بحری ناکہ بندی نافذ کیے ہوئے ہے، جبکہ ایران نے اعلان کیا ہے کہ وہ آبنائے ہرمز سے گزرنے والے ان جہازوں کو نشانہ بنا رہا ہے جو اس کے مقرر کردہ بحری ضوابط کی خلاف ورزی کرتے ہیں۔ دنیا کی تقریباً 20 فیصد حصے کی تیل تجارت اسی اہم آبی گزرگاہ سے ہوتی ہے۔

برطانوی میری ٹائم ٹریڈ آپریشنز ایجنسی کے مطابق پیر کی صبح عمان کے شمال مغرب میں واقع کمزار کے قریب ایک بحری جہاز میں آگ لگ گئی۔