اداکارہ میرا مشکل میں؟ سی سی ٹی وی فوٹیج سامنے آگئی

لاہور: معروف اداکارہ میرا کی جانب سے مبینہ طور پر اپنی گھریلو ملازمہ پر تشدد کی سی سی ٹی وی فوٹیج سامنے آگئی، جس کے بعد واقعے نے سوشل میڈیا پر بھی توجہ حاصل کرلی۔

سامنے آنے والی ویڈیو میں اداکارہ میرا کو مبینہ طور پر ملازمہ کو دھکے دیتے اور تھپڑ مارتے دیکھا جاسکتا ہے۔

متاثرہ گھریلو ملازمہ نے میڈیا اور سوشل میڈیا پر جاری اپنے بیان میں الزام عائد کیا ہے کہ اداکارہ میرا مبینہ طور پر روزمرہ امور کے دوران اس پر شدید تشدد کرتی رہی ہیں۔

ملازمہ نے اربابِ اختیار اور متعلقہ قانون نافذ کرنے والے اداروں سے واقعے کا فوری نوٹس لینے، شفاف تحقیقات اور انصاف کی فراہمی کا مطالبہ کیا ہے۔

دوسری جانب مبینہ تشدد سے متعلق مزید ویڈیوز بھی سامنے آئی ہیں جو سوشل میڈیا پر وائرل ہوگئی ہیں۔ ویڈیوز سامنے آنے کے بعد صارفین اور سول سوسائٹی کی جانب سے بھی واقعے کی شفاف تحقیقات کا مطالبہ کیا جارہا ہے۔

تاہم واقعے کے حوالے سے اداکارہ میرا کا مؤقف تاحال سامنے نہیں آیا۔ اس لیے تشدد کے الزامات کو فی الحال مبینہ طور پر ہی بیان کیا جارہا ہے۔