نصرت فتح علی خان کی آخری آرام گاہ پر ایسا کیا ہوا؟ نئی ویڈیو نے نئی بحث چھیڑ دی

لاہور: عالمی شہرت یافتہ پاکستانی گلوکار راحت فتح علی خان نے لیجنڈری قوال نصرت فتح علی خان کی برسی کے موقع پر ان کی آخری آرام گاہ پر حاضری دی، جہاں ان کی جانب سے قوالی پیش کیے جانے کی ویڈیو سامنے آنے کے بعد سوشل میڈیا پر نئی بحث چھڑ گئی۔

نصرت فتح علی خان کو دنیا سے رخصت ہوئے تین دہائیاں گزر چکی ہیں، تاہم ان کی آواز اور فن آج بھی مداحوں کے دلوں میں زندہ ہے۔

ان کی برسی کے موقع پر راحت فتح علی خان اور ان کے بیٹے شاہ زمان علی خان نے نصرت فتح علی خان کی آخری آرام گاہ پر حاضری دی۔

اس موقع پر دونوں نے وہاں کلام اور قوالی پیش کی۔ قوالی کے دوران نذرانے کے طور پر نوٹ بھی نچھاور کیے گئے، جبکہ بڑی تعداد میں مداح اور دیگر افراد بھی وہاں موجود تھے۔

قوالی کی ویڈیوز سوشل میڈیا پر وائرل ہونے کے بعد صارفین کی جانب سے مختلف ردِعمل سامنے آ رہے ہیں۔ بعض صارفین نے قبر پر اس انداز میں قوالی پیش کرنے کو سخت ناپسند کیا اور راحت فتح علی خان کو تنقید کا نشانہ بنایا۔

واقعے کی ویڈیوز سوشل میڈیا پر تیزی سے وائرل ہیں اور راحت فتح علی خان کے اس اقدام پر سوشل میڈیا پر بحث جاری ہے۔