لارڈز ٹیسٹ کا دوسرا روز: انگلینڈ کے خلاف پاکستان ٹیم 110 رنز پر ڈھیر

ویب ڈیسک: انگلینڈ کے خلاف لارڈز ٹیسٹ کے دوسرے روز پاکستان ٹیم اپنی پہلی اننگز میں 110 رنز بنا کر ڈھیر ہوگئی ہے اور انگلینڈ نے قومی ٹیم پر 180 رنز کی برتری حاصل کرلی ہے۔ اس سے قبل انگلش ٹیم اپنی پہلی اننگز میں 290 رنز بناکر پر آؤٹ ہوگئی تھی۔

لارڈز میں کھیلے جارہے دوسرے ٹیسٹ میچ میں پاکستان نے ٹاس جیت کر پہلے فیلڈنگ کا فیصلہ کیا، بارش کے باعث پہلے روز کھیل تاخیر سے شروع ہوا اور صرف 56 اوورز کا کھیل ممکن ہوسکا اور پہلے دن کے اختتام پر انگلینڈ 9 وکٹوں کے نقصان پر 248 رنز بنا چکا تھا۔

انگلینڈ کی آخری گرنے والی وکٹ گس آٹکنسن کی تھی، جو 45 رنز بنا کر علی عثمان کی گیند پر محمد علی کے ہاتھوں کیچ آؤٹ ہوئے جب کہ جوش ٹنگ 30 رنز بنا کر ناٹ آؤٹ رہے۔ اس کے ساتھ ہی انگلینڈ کی پوری ٹیم 66.4 اوورز میں 290 رنز پر پویلین لوٹ گئی۔

انگلینڈ کی جانب سے جیمی اسمتھ 61 رنز کے ساتھ ٹاپ اسکورر رہے، انہوں نے 80 گیندوں کا سامنا کرتے ہوئے 10 چوکے لگائے اور جارڈن کاکس نے 55 رنز کی ذمہ دارانہ اننگز کھیلی۔ اسی طرح دیگر بلے بازوں میں بین ڈکٹ نے 17، ایمیلیو گے نے 8، کپتان جو روٹ نے 4، ہیری بروک نے 15، ڈین لارنس نے 17 اور جوفرا آرچر نے 14 رنز بنائے جب کہ اولی رابنسن بغیر کوئی رن بنائے آؤٹ ہوئے۔ انگلینڈ کے مجموعے میں اضافی رنز کی تعداد 24 رہی۔

پاکستان کی جانب سے محمد عباس سب سے کامیاب گیند باز رہے۔ انہوں نے 20 اوورز میں 73 رنز دے کر 4 وکٹیں حاصل کیں اور محمد علی نے 22 اوورز میں 86 رنز دے کر 3 وکٹیں حاصل کیں جب کہ خرم شہزاد اور علی عثمان نے ایک، ایک وکٹ حاصل کی۔