انسپکٹر جمشید پر بننے والی فلم کا پہلا ٹریلر جاری

کلچرل رپورٹرسے

لاہور : معروف اداکار احد رضا میر اور عمیر رانا کی نئی فلم، جبکہ نامور مصنف اشتیاق احمد کے مقبول جاسوسی کردار انسپکٹر جمشید پر بننے والی فلم ’’IJ: The Secret Parchment‘‘ کا پہلا ٹریلر جاری کر دیا گیا۔

ٹریلر میں انسپکٹر جمشید اور ان کے خاندان کو ایک پراسرار کیس میں الجھتے دکھایا گیا ہے، جس میں راز، خطرات اور جاسوسی کی کہانی نمایاں ہیں۔ فلم کی کہانی ایک پراسرار پارچمنٹ کے گرد گھومتی ہے، جس کے راز سے پردہ اٹھانے کی کوشش کے دوران کئی نئے سوالات جنم لیتے ہیں۔

اشتیاق احمد کے جاسوسی ناولز پڑھنے والی نسل کے لیے انسپکٹر جمشید ایک یادگار کردار کی حیثیت رکھتے ہیں۔ ان کرداروں کو فلم کے ذریعے پاکستان کے ساتھ ساتھ بین الاقوامی ناظرین تک پہنچانا ایک منفرد اور قابلِ ذکر کوشش قرار دیا جا رہا ہے۔

فلم کے ایگزیکٹو پروڈیوسر محمد عدنان بٹ کا کہنا ہے کہ انسپکٹر جمشید ہمارا اپنا ہیرو ہے، جسے اب عالمی سطح پر متعارف کرانے کی کوشش کی جا رہی ہے۔

انہوں نے کہا کہ اشتیاق احمد نے کئی دہائیاں قبل جس تخیلاتی دنیا کی بنیاد رکھی، اسے آج جدید فلمی انداز میں آگے بڑھانا ان کے لیے باعثِ فخر ہے۔

فلم کے اسکرین رائٹر ایرک برگ نے کہا کہ انسپکٹر جمشید اب صرف کسی ایک ملک کا کردار نہیں بلکہ پوری دنیا کے ناظرین کے لیے ہے۔

ہدایت کار فہد نور کے مطابق فلم میں جاسوسی اور ایکشن کے ساتھ خاندان اور انسانی جذبات کو بھی خصوصی اہمیت دی گئی ہے۔

فلم میں عمیر رانا انسپکٹر جمشید، احد رضا میر بہزاد، فاران طاہر زرفر برکی، آصف رضا میر خان رحمان اور جاد حدید انسپکٹر اکرام کے کردار میں نظر آئیں گے، جبکہ انوشے عباسی مسز جمشید کا کردار ادا کر رہی ہیں۔

بین الاقوامی کاسٹ میں اورلی شوکا، کیسی شینن، احمد حرقوس، الائن حرقوس اور راول عمران شامل ہیں۔

فلم کی عکسبندی متحدہ عرب امارات میں کی گئی ہے، جبکہ ایکشن ڈائریکشن کی ذمہ داری جارج کربی نے انجام دی ہے۔ فلم کی ہدایت کاری فہد نور نے کی ہے۔

فلم Dot Republic Media اور CreatorsOne Studios FZ کے اشتراک سے تیار کی گئی ہے، جبکہ Walnut Media بھی اس پروجیکٹ کا حصہ ہے۔

فلم میں پاکستانی اور بین الاقوامی فنکاروں اور تکنیکی ماہرین کی مشترکہ کاوش سے ایک معروف پاکستانی جاسوسی کردار کو عالمی سنیما کے انداز میں پیش کیا گیا ہے۔