سائرہ پیٹر ستارۂ امتیاز کے لیے منتخب، لاہور میں شاندار خراجِ تحسین

کلچرل رپوڑر سے

لاہور: عالمی شہرت یافتہ برطانوی پاکستانی سوپرانو اور صوفی اوپرا گلوکارہ سائرہ پیٹر کے لیے لاہور کے پرل کانٹی نینٹل ہوٹل میں ایک خصوصی تقریب کا انعقاد کیا گیا، جس میں حکومتِ پاکستان کی جانب سے انہیں ستارۂ امتیاز کے لیے منتخب کیے جانے پر خراجِ تحسین پیش کیا گیا۔

تقریب میں موسیقی، فنونِ لطیفہ اور میڈیا سے وابستہ ممتاز شخصیات نے شرکت کی۔ مقررین نے سائرہ پیٹر کی پاکستانی موسیقی، شاعری اور صوفی روایات کو عالمی سطح پر متعارف کرانے کی کاوشوں کو سراہا۔

اس موقع پر سائرہ پیٹر نے حکومتِ پاکستان، میڈیا اور پاکستانی عوام کا شکریہ ادا کرتے ہوئے کہا کہ ستارۂ امتیاز کے لیے انتخاب ان کے فنی سفر کا ایک انتہائی اہم اور جذباتی لمحہ ہے۔ یہ اعزاز صرف ان کی ذاتی فنی خدمات کا اعتراف نہیں بلکہ پاکستان کے شاندار موسیقی اور ثقافتی ورثے کی بھی پذیرائی ہے۔

تقریب کا آغاز سائرہ پیٹر کے فنی سفر اور عالمی سطح پر ان کی پرفارمنسز پر مبنی ایک خصوصی شو ریل سے ہوا، جس میں لندن کے رائل البرٹ ہال، امریکا اور اقوامِ متحدہ سمیت مختلف عالمی پلیٹ فارمز پر ان کی یادگار پرفارمنسز کی جھلکیاں دکھائی گئیں۔

شو ریل میں اس امر کو اجاگر کیا گیا کہ سائرہ پیٹر نے پاکستانی موسیقی، صوفی شاعری اور اپنی منفرد اوپرا گائیکی کے ذریعے دنیا بھر میں پاکستان کے ثقافتی تشخص کو اجاگر کیا۔ بعد ازاں انہوں نے اپنے فن کا مظاہرہ کرتے ہوئے منتخب کلام اور گیت پیش کیے، جنہیں حاضرین نے بھرپور داد دی۔

تقریب میں معروف موسیقار نوید نشاد، معروف نغمہ نگار ظفر فرانسس اور برطانوی میوزک ڈائریکٹر اسٹیفن اسمتھ سمیت موسیقی، میڈیا اور فنونِ لطیفہ سے وابستہ دیگر شخصیات نے شرکت کی۔

حکومتِ پاکستان نے 2026ء کے سول ایوارڈز کے لیے سائرہ جان پیٹر کو بھی منتخب کیا ہے۔ انہیں موسیقی اور فنونِ لطیفہ کے لیے خدمات کے اعتراف میں ستارۂ امتیاز سے نوازا جائے گا۔ سول ایوارڈز کے لیے ناموں کا اعلان یومِ آزادی کے موقع پر کیا گیا، جس میں فنکاروں سمیت مختلف شعبوں میں نمایاں خدمات انجام دینے والی شخصیات کو شامل کیا گیا۔

کراچی میں پیدا ہونے والی سائرہ پیٹر ایک برطانوی پاکستانی سوپرانو ہیں اور صوفی اوپرا کے منفرد فن کو فروغ دینے کے حوالے سے جانی جاتی ہیں۔ ان کا فن مغربی کلاسیکی اوپرا کو جنوبی ایشیائی کلاسیکی اور صوفی موسیقی کی روایات سے جوڑتا ہے۔

لندن منتقل ہونے کے بعد انہوں نے مغربی کلاسیکی گائیکی کی باقاعدہ تربیت حاصل کی جبکہ راگ داری، یعنی ہندوستانی کلاسیکی موسیقی میں اظہارِ موسیقی کے روایتی انداز کا بھی مطالعہ کیا۔ ان کی موسیقی میں اوپرا کی فنی تکنیک کے ساتھ پاکستانی شاعری، روایتی دھنوں اور روحانیت، امن اور ثقافتی ہم آہنگی جیسے موضوعات کا حسین امتزاج نظر آتا ہے۔

سائرہ پیٹر پاکستان اور بیرونِ ملک متعدد اہم ثقافتی، سفارتی اور عالمی پلیٹ فارمز پر پرفارم کر چکی ہیں۔ ان کی پرفارمنسز میں ایوانِ صدر سمیت کئی معروف مقامات شامل ہیں، جہاں انہوں نے اوپرا کے منفرد انداز میں پاکستانی شاعری اور صوفی فکر کو عالمی سامعین تک پہنچایا۔