پاک بحریہ کی بحیرہ عرب میں کارروائی،2,800 کلوگرام سے زائد منشیات ضبط

پاک بحریہ کے جہازوں حنین اور یرموک نے بحیرہ عرب میں منشیات کے خلاف مشترکہ کارروائی کے دوران دو ہزار آٹھ سو کلوگرام سے زائد منشیات قبضے میں لے لیں، جن کی مالیت تقریبا پچھتر کروڑ ڈالر ہے۔

فوج کے شعبہ تعلقات عامہ کے مطابق جہاز معمول کے گشت پر تھے جب انہوں نے ایک مشتبہ کشتی کو روکا اور تلاشی کی کارروائی کے دوران خفیہ خانوں سے منشیات برآمد کیں۔

پاک بحریہ کے سربراہ ایڈمرل نوید اشرف نے افسران اور عملے کی پیشہ ورانہ مہارت کو سراہتے ہوئے بحری سلامتی یقینی بنانے اور سمندر میں غیر قانونی اسمگلنگ کے خلاف کارروائی کیلئے پاک بحریہ کے عزم کا اعادہ کیا۔