مصطفیٰ زاہد پہلی بار پاکستانی فلم کا میوزک بنائیں گے

عبدالسلام علی سے  

لاہور: بین الاقوامی شہرت یافتہ گلوکار و موسیقار مصطفیٰ زاہد پہلی بار کسی پاکستانی فلم کے لیے موسیقی ترتیب دیں گے۔ انہوں نے کہا ہے کہ وہ فلم کی کہانی کے آغاز ہی سے اس کے میوزک سے وابستہ رہنا چاہتے تھے، کیونکہ ان کے نزدیک فلم کی کامیاب موسیقی کے لیے میوزک ڈائریکٹر کا ابتدا ہی سے تخلیقی ٹیم کا حصہ ہونا ضروری ہے۔

ایک پریس کانفرنس سے خطاب کرتے ہوئے مصطفیٰ زاہد نے کہا کہ انہوں نے ہمسایہ ملک کی فلموں میں گانے گانے کے ساتھ موسیقی بھی دی ہے، جبکہ انہیں ماضی میں کئی مرتبہ پاکستانی فلموں کے لیے میوزک دینے کی پیشکش ہوئی، تاہم انہوں نے اس وقت کام نہیں کیا۔ ان کے مطابق اعجاز شاہد نے ان سے رابطہ کرکے فلم کی ون لائن سنائی، جو ایک مکمل لو اسٹوری ہے۔

انہوں نے کہا کہ پاکستان آکر کانسرٹ کرنے میں انہیں ہمیشہ خوشی ہوئی ہے اور اب پہلی بار پاکستانی فلم کے لیے موسیقی ترتیب دے رہے ہیں۔ ان کا کہنا تھا کہ پاکستان میں عموماً فلم مکمل ہونے کے بعد میوزک ڈائریکٹر سے رابطہ کیا جاتا ہے، جبکہ ہمسایہ ملک میں فلم کے میوزک پر دو سال پہلے سے کام شروع کردیا جاتا ہے۔

مصطفیٰ زاہد نے کہا کہ پاکستانی فلم میں ایسا میوزک سننے کو ملے گا جو اس سے قبل نہیں سنا گیا ہوگا۔ انہوں نے کہا کہ اگر کوئی صرف کسی اداکار کے فلم میں شامل ہونے کی بنیاد پر گانے بنانے کو کہے تو وہ ایسا نہیں کرسکتے۔ انہوں نے شان شاہد اور ہمایوں سعید کو پاکستانی فلم انڈسٹری کے بڑے نام قرار دیا۔

فلم کے ہدایت کار اعجاز شاہد نے کہا کہ یہ ایک لو اسٹوری ہے اور انہیں نئے لوگوں کے ساتھ کام کرکے خوشی ہوتی ہے۔ ان کے مطابق یہ ایک چیلنج ہے اور زندگی میں چیلنجز قبول کرنے چاہییں۔ فلم یوتھ بیسڈ میوزیکل بینڈ کی کہانی پر مبنی ہے اور لو اسٹوری گانوں کے بغیر مکمل نہیں ہوسکتی۔

انہوں نے کہا کہ میوزک کے حوالے سے ان کے ذہن میں پہلا نام مصطفیٰ زاہد کا آیا۔ فلم کی شوٹنگ نومبر میں شروع ہوگی۔

فلم رائٹر مظہر انجم نے کہا کہ انہوں نے 27 سال بعد فلم لکھی ہے اور کوشش کی ہے کہ یہ فلم ہمسایہ ملک کی کسی فلم سے مشابہ نہ ہو۔ ان کے مطابق یہ ایک مکمل میوزیکل لو اسٹوری ہے، جو شیک فلمز کے بینر تلے بنائی جارہی ہے۔