دفترخارجہ نے بھارتی وزیردفاع کے پاکستان کیخلاف اشتعال انگیز بیان کو مسترد کر دیا

اسلام آباد: دفتر خارجہ کے ترجمان سجاد حیدر خان نے بھارتی وزیر دفاع کے اشتعال انگیز بیان کو مسترد کرتے ہوئے اس کی مذمت کی ہے، جس میں پاکستان کے خلاف بھارتی جارحیت کی دھمکی دی گئی ہے۔

انہوں نے جمعہ کے روز اسلام آباد میں ہفتہ وار میڈیا بریفنگ کے دوران ایک سوال کا جواب دیتے ہوئے کہا کہ اس طرح کے غیر ذمہ دارانہ بیانات سے بھارت کا جنگی جنون ظاہر ہوتا ہے۔

انہوں نے کہا کہ بھارت کا جارحانہ طرزِ عمل جنوبی ایشیا میں علاقائی امن و استحکام کے لیے بڑا خطرہ ہے۔

سعودی عرب پر حوثی ملیشیا کے حملوں کا ذکر کرتے ہوئے ترجمان نے کہا کہ پاکستان حوثی ملیشیا کے تازہ دہشت گرد حملے کی شدید مذمت کرتا ہے، جس میں ریاض میں شاہ خالد بین الاقوامی ہوائی اڈے کو نشانہ بنایا گیا۔

انہوں نے مکہ مشترکہ دفاعی معاہدے سمیت سعودی عرب کی خودمختاری، علاقائی سالمیت، سلامتی اور استحکام کے لیے پاکستان کے غیر متزلزل عزم کا اعادہ کیا۔