پی ٹی آئی کو ایک اور شکست، این اے 221 تھرپارکر میں پیپلز پارٹی واضح اکثریت سے کامیاب

جی این این کے مطابق قومی اسمبلی کے حلقہ  این اے 221 تھرپارکر  کی نشست  پر ضمنی الیکشن کا معرکہ پیپلزپارٹی نے بھاری اکثریت سے جیت لیا۔ پی ٹی آئی کے امیدوار دوسرے نمبر پر رہے۔ تمام318 پولنگ اسٹیشنوں کے غیرحتمی  اور غیر سرکاری نتائج کے مطابق پیپلزپارٹی کے پیر امیر علی شاہ جیلانی ایک لاکھ تین ہزار پانچ سو دو  ووٹ لےکر پہلے نمبر پر رہے۔ جبکہ پی ٹی آئی کےامیدوار نظام الدین راہمو پچاس ہزار پانچ سو تریپن ووٹ  لیکر دوسرے نمبر پر رہے۔ ووٹرز کا ٹرن آؤٹ45 فیصد رہا۔

حلقے میں کل رجسٹرڈ ووٹرز کی تعداد 2 لاکھ 81 ہزار 900 ہے، حلقے بھر میں 318 پولنگ اسٹیشنز قائم کیے گئے تھے، جن میں سے 95 کو انتہائی حساس جب کہ 130 کو حساس قرار دیا گیا تھا۔ پولنگ کا عمل غیر جانب دارانہ اور شفاف بنانے کے لیے 4 ہزار پولیس اہل کار اور ایک ہزار رینجرز کے جوان سکیورٹی پر تعینات تھے ۔ پیپلز پارٹی کے امیدوار کی جیت کے بعد جیالوں نے خوب جشن منایا۔جی این این سے گفتگو کرتے ہوئے پی پی امیدوار پیر امیر علی شاہ جیلانی  کاکہنا تھا کہ اللہ کےکرم اورعوام کی طاقت سےکامیابہ ملی،کسی قسم کی سرکاری مشینری استعمال نہیں کی۔ حلقے میں  پانی  اور تعلیم کا مسئلہ حل کرینگے۔

دوسری جانب پولنگ کے دوران کئی مقامات پر ناخوشگوار واقعات بھی پیش آئے  ۔کچھ شرپسندوں نے قیصر اڑسمان  پولنگ اسٹیشن کو آگ لگادی۔ جس سے   بیلٹ پیپر اور باکس جل گئے۔پولنگ کاعمل بھی متاثرہوا۔  سندھ پولیس نے آگ کو حادثاتی واقعہ قرا ردیدیا جبکہ پی ٹی آئی کے5 کارکنوں کو گرفتار کرلیا ۔پی ٹی آئی نےالزام لگایا کہ پولنگ اسٹیشن کو پیپلز پارٹی کی ایما پر آگ لگائی گئی۔

یادرہے کہ اس سے پہلے 20 فروری کو سندھ اسمبلی کے حلقے پی ایس 88 ملیر  اور پی ایس 43 سانگھڑ کے ضمنی  انتخابات میں بھی  پیپلزپارٹی میدان مارچکی ہےجبکہ اسی روزپشین سے پی ڈ ی ایم کے امیدوار نے تحریک انصاف کے خلاف فتح حاصل کی۔تاہم وزیر آباد اور نوشہرہ کی دو صوبائی نشستوں پر مسلم لیگ ن نے فتح حاصل کی۔