سری لنکا کے ساتھ تعلقات کو مزید مضبوط کرنا چاہتے ہیں:وزیراعظم

تفصیلات کے مطابق دورہ سری لنکا کے دوران وزیراعظم عمران خان نے سری لنکن ہم منصب مہندا راجا پاکسا سے ان کے آفس میں ملاقات کی اس موقع پر سری لنکن وزیراعظم نےوزیراعظم عمران خان کا استقبال کیا۔وزیراعظم عمران خان اور  سری لنکن ہم منصب مہندا راجا پاکسا کے درمیان ہونے والی  ون آن ون ملاقات میں دو طرفہ تعلقات کے فروغ اور خطے کی صورتحال پر تبادلہ خیال کیا گیا جبکہ پاکستان اور سری لنکن قیادت کے درمیان وفود کی سطح پر بھی مذاکرات ہوئے۔

بعدا زاں وزیراعظم عمران خان اور  سری لنکن ہم منصب مہندا راجا پاکسا نے مشترکہ پریس  کانفرنس کی جس میں وزیر اعظم عمران خان کا کہنا تھا کہ میری سری لنکا کے ساتھ کافی اچھی یادیں ہیں،سری لنکا کی کرکٹ ٹیم کو اپنی آنکھوں کے سامنے ابھرتے ہوئے دیکھا،میرا دورہ پاکستان اور سری لنکا کے تعلقات کو مزید مضبوط بنانے کیلئے ہے،پاکستان سری لنکا کے ساتھ تعلقات کو مزید مضبوط کرنا چاہتا ہے،پاکستان اور سری لنکا دونوں کو دہشت گردی کا سامنا ہے،پاکستان نے دہشت گردی کیخلاف جنگ میں سب سے زیادہ جانیں قربان کیں جبکہ سری لنکا بھی پچھلے 30سال سے دہشت گردی کیخلاف لڑرہا ہے۔

انہوں نے مزید کہا کہ  دہشت گردی کے بعد آج کل سب سے بڑا مسئلہ کورونا وائرس کا ہے،کورونا وائرس سے غریب ممالک کو زیادہ مشکلات کا سامنا ہے، ہم نے اس پر بھی بات کی کہ دونوں ملک مل کرکورونا سے لڑیں،کورونا وائرس کیخلاف جنگ میں ڈویلپڈ ممالک کو غریب ملکوں کی مدد کرنی چاہیے،میں میڈیا کے سامنے بھی سری لنکن وزیراعظم کو پاکستان کے دورے کی دعوت دیتا ہوں۔

وزیراعظم نے مزید کہا کہ سی پیک سے سری لنکن کو خطے میں آسان رسائی حاصل ہو گی ،خواہش ہے سری لنکا بھی سی پیک سے فائدہ حاصل کرے۔

دوسری جانب سری لنکن وزیراعظم نے کہا کہ وزیراعظم پاکستان سےمختلف شعبوں میں تعاون بڑھانے پر اتفاق ہوا،آزادانہ تجارتی فریم ورک کوحتمی شکل دینےپر بھی اتفاق ہوا۔