پاکستان سے مملکت کے لیے پروازوں میں اضافہ کریں گے، سعودی سفیر نواف سعید المالکی

اسلام آباد: پاکستان میں تعینات سعودی سفیر نواف سعید المالکی نے خوشخبری سنائی ہے کہ پاکستان سے مملکت کے لیے پروازوں میں اضافہ کریں گے۔

نواف سعید کا کہنا تھا کہ سعودی عرب پاکستانیوں کے لیے دوسرا گھر ہے، براہ راست پروازوں کی بحالی کے بعد کوئی اپنے اہل خانہ سے ملنے مملکت جارہا ہے تو کسی کو کام کے سلسلے میں جانا ہے۔ انہوں نے کہا کہ امید ہے پروازوں کا یہ عمل بغیر کسی رکاوٹ کے چلتا رہے گا، سعودی عرب کے لیے نئے ویزوں کا طریقہ کار بھی تبدیل ہوچکا ہے۔

سعودی سفیر نے مزید بتایا کہ اگلے ہفتے جدہ اور ریاض کے لیے پروازوں میں اضافہ کیا جائے گا۔ خیال رہے کہ سعودی عرب اور پاکستان کے درمیان معطل ہونے والا فضائی آپریشن مکمل طور پر بحال ہوگیا ہے، سعودی حکومت کے اس اقدام کو پاکستانی شہریوں نے سراہا۔

گزشتہ روز اسلام آباد سے پہلی پرواز مملکت کے لیے روانہ ہوئی، اس موقع پر مسافروں نے بے حد خوشی کا اظہار کیا۔