وزیر اعظم کی سربراہی میں وفاقی کابینہ کا اہم اجلاس آج ہوگا

تفصیلات کے مطابق وزیر اعظم  عمران خان کی زیر صدارت  کابینہ اجلاس میں ملکی،  سیاسی  و معاشی صورتحال کا جائزہ لیا جائیگا ۔ ذرائع کے مطابق کابینہ اجلاس میں انٹرنیشنل این جی اوز کےلئے ویزا پالیسی پیش ہوگی ، وزارت داخلہ کی جانب سے انٹرنیشنل این جی اوز کےلئے ویزا پالیسی پر بریفنگ دی جائے گی ۔

کابینہ اجلاس میں شوگر سیکٹر میں اصلاحات پر بنائی گئی کمیٹی کی رپورٹ پیش ہوگی جبکہ افغانستان سے متعلق ویزا پالیسی میں تبدیلی سے متعلق وزارت داخلہ کی سمری پیش ہوگی۔ 

ذرائع کے مطابق کابینہ اجلاس  میں انسانی ہمدردی کی بنیاد پر افغانوں اور غیرملکی شہریوں کے تیسرے ملک انخلاء کے فیز 2 پر سمری کابینہ میں پیش ہوگی۔ 

غیرملکی این جی اوز کےلئے افغانستان میں ریلیف کاموں کےلئے مجوزہ میکنزم بھی ایجنڈے میں شامل ہے جبکہ کابینہ میں ،10،50،100 اور 1000 روپے کے پرانے نوٹوں کی تبدیلی کےلئے وقت بڑھانے کا فیصلہ ہوگا۔ 

پاکستان اور تاجکستان کے درمیان نئے ائیر روٹ کے معاہدہ کی منظوری کابینہ ایجنڈا میں شامل ہے ،  قازقستان کی ائیرلائن ایس سی اے ٹی کے ساتھ معاہدہ کی منظوری  سمیت  پاکستان اور عراق کےدرمیان ائیر سروس معاہدہ میں کوڈ شئیرنگ کی شق شامل کرنے کی منظوری  بھی کابینہ ایجنڈے میں شامل ہے ۔ 

صنعت و پیدوار سے متعلق کابینہ کے فیصلے پر رپورٹ پیش ہوگی ، کابینہ  چینی آئل کمپنی چائنہ زینیویا کے 33اعشاریہ 50 فیصد ورکنگ انٹرسٹ اور آپریٹرشپ پاکستان پٹرولیم لیمیٹڈ کو منتقل کرنے کی منظوری دے گی ۔ 

اوگرا کی سالانہ رپورٹس سال 2019-20 کابینہ میں پیش ہوگی ، کابینہ کمیٹی ادارہ جاتی اصلاحات کے 24 نومبر کے فیصلوں کی توثیق  ہوگی ۔

کابینہ کمیٹی توانائی کے 2 دسمبر کے فیصلوں کی توثیق ایجنڈا میں شامل ہے جبکہ  اقتصادی رابطہ کمیٹی کے10 دسمبر کے فیصلوں کی توثیق ایجنڈا میں شامل ہے ۔