بچوں کی کفالت باپ کی ذمہ داری ہے چاہے باپ بے روزگار ہی کیوں نہ ہو، سپریم کورٹ

تفصیلات کے مطابق سپریم کورٹ نے بہاولپور کے رہائشی غلام دستگیر کی بچوں کی کفالت کی رقم کم کرنے کی درخواست خارج کر دی ہے۔عدالت کا کہنا ہے کہ بچوں کی کفالت باپ کی ذمہ داری ہے چاہے باپ بے روزگار ہی کیوں نہ ہو، سپریم کورٹ نے ٹرائیل کورٹ اور ہائی کورٹ کا فیصلہ برقرار کھتے ہوئے غلام دستگیر کو دونوں بیٹیوں کو 15 ہزار ماہانہ دینے کا حکم دے دیا۔

درخواست گزار غلام دستگیر نے کہا کہ  نہ میں تعلیم یافتہ ہوں اور نہ ہی کوئی کام کرتا ہوں ،فی بچہ 15 ہزار ادا نہیں کر سکتا، میری سابقہ اہلیہ میری بوڑھی ماں سے مجھے الگ کرنا چاہتی تھی،جس پر جسٹس سجاد علی شاہ نے کہا کہ  ماں کی خدمت کرنا آپکی ذمہ داری تھی آپکی سابقہ اہلیہ کی نہیں،  اگر بیوی الگ رہنے کا مطالبہ کرے تو بیوی کو الگ رکھنا شوہر کی ذمہ داری ہے۔

جسٹس عمر عطاء بندیال نے کہا کہ  آپ جوان اور صحت مند ہیں آپ کام کیوں نہیں کرتے،  دونوں بچیاں سکول میں پڑھتی ہیں جنکی کفالت آپ ہی نے کرنی ہے۔

خیال رہے کہ کیس کی سماعت جسٹس عمر عطاء بندیال کی سربراہی میں سپریم کورٹ کے تین رکنی بنچ نے کی۔